Breitt yfir sannleikann

Af hverju geta menn ekki sagt sannleikann? Af hverju er látið í verðri vaka að Íslendingar hafi, af ásetningi, bjargað hinni austurrísku Melittu Urbancic og börnum hennar úr klóm nazista 1938, af því að hún var gyðingur?  

Íslendingar lögðu sig hreint ekki fram að bjarga gyðingum úr klóm nazista á þessum árum, rök má raunar færa fyrir hinu gagnstæða. Melitta, sem var austurrískur  gyðingur, fékk náðarsamlegast landvist hér á landi af þeirri ástæðu einni að maður hennar, hinn kunni tónlistarmaður Victor Urbancic, var ráðin hingað til starfa.

Það er því miður hrollköld staðreynd að án mansins síns hefði þessi merka kona örugglega ekki fengið landvistarleyfi á Íslandi! Því til marks, þá sótti Melitta um landvist fyrir móður sína en  „jákvæða umhverfið“ á Íslandi, sem nefnt er í fréttinni, náði ekki lengra en svo að þeirri beiðni var hafnað af Íslenskum stjórnvöldum.  

Þess í stað endaði móðir Melittu ævi sína í fangabúðum Nasista!

Gerum ekki skömm okkar meiri en orðið er með því að breiða yfir eða afbaka sannleikann um afstöðu Íslenskra stjórnvalda til gyðinga á þessum árum og annarra sem ekki féllu að hinni rammíslensku staðalímynd.

Íslendingar björguðu hæfileikafólki