Siðleysi Sigmundar og Bjarna?

Af gefnu tilefni hafa siðareglur ríkisstjórnarinnar, eða öllu heldur skortur á þeim, verið í brennidepli undanfarið. Ríkisstjórninni ber samkvæmt lögum að setja sér siðareglur en hefur ekki enn drattast til þess þó hún nálgist að hafa setið þriðjung kjörtímabilsins.

Siðareglur geta klárlega hjálpað ráðherrum að breyta rétt og forðað þeim frá því að lenda í siðferðiskrísu og þannig eflt traust almennings á stjórnsýslunni.

En af hverju þarf hver ríkisstjórn að setja sjálfri sér siðareglur, er ekki eðlilegast að Alþingi setji ríkistjórnum siðareglur í eitt skipti fyrir öll? Getur það verið að tvær ríkisstjórnir geti ekki starfað eftir sömu grunnhugmyndum almenns siðferiðs? Þarf Bjarni Ben aðrar siðareglur en Steingrímur J og Sigmundur aðrar en Jóhanna? Ef því er þannig  varið er þá nokkur ástæða til að sömu lög gildi um alla Íslendinga? Að vísu má færa fyrir því nokkur rök,  þó það sé ekki grunnhugsunin, að fyrir lögunum séu sumir töluvert jafnari en aðrir.

Svo er alveg eins víst að ráðherrar, sem hirða ekki um að fara að lögum og setja sér siðareglur, séu ekki líklegir til að fara eftir slíkum reglum, ef þær eru þeim ekki meira kappsmál en raun ber vitni.

Athugasemdir

[Bergljót Gunnarsdóttir, 13.8.2014 kl. 20:12]

Mér finnst sjálfsagt að Alþingi setji skýrar og ábyrgar siðareglur um vinnulag ríkisstjórna, sem og þingmanna og annarra starfsmanna þingsins í lög landsins.

Skýrar siðareglur eru forsenda heiðarlegra og vonandi gagnsærra vinnubragða í þessari stofnun sem svo lengi hefur haft innan vébanda sinna alltof marga þingmenn sem eru þarna að mestu í eiginhagsmunaskyni, hafandi gleymt því fullkomnlega að þeir eru í vinnu hjá fólkinu sem kaus þá á þing. Það hefur oft ergt mig hvað þeir senda heiðarlegum samþingmönnum sínum langt nef, þegar þeir hafa sínu fram í skjóli þess að enginn virðist þurfa að fara eftir föstum siðareglum.

Ef sömu reglur giltu fyrir alla - alltaf, ætti jafnvel að hreinsast til í röðum þessa fólks og við að fá betri stjórn.

[Bergljót Gunnarsdóttir, 13.8.2014 kl. 20:15]

Auðvitað yrði líka að fylgja þessu skýr refsirammi sem yrði fylgt eftir, hver sem ætti í hlut.

[Axel Jóhann Hallgrímsson, 17.8.2014 kl. 14:51]

Auðvitað á Alþingi að setja ríkisstjórn siðareglur. Það á ekki að vera í höndum ráðherra að semja sérhannaðar "siðareglur" fyrir sig sjálfa um leið og þeir taka við embætti. Brot eiga að varða við refsingu.