Geir skilar auðu – á ný

Stefnuræða forsætisráðherra og umræður um hana voru í kvöld.  Ég býst við að fleiri hafi horft eða hlustað með andakt nú en oft áður, vegna þeirrar stöðu sem uppi er í þjóðfélaginu.

Forsætisráðherra hafði hér tækifæri til að blása til sóknar og stappa stálinu í þjóðina. En ekkert slíkt gerðist, ræðan var rýr í roðinu, aðeins upptalning á staðreyndum almennt og vítt orðað,  forsætisráðherra skilaði auðu!

Það kom ekki á óvart að bestu ræðumenn kvöldsins voru Össur Skarphéðinsson og Steingrímur J. Sigfússon.

Ræða Steingríms kom mér nokkuð á óvart. Hún var innblásin af baráttuanda og vilja til verka, gegn þeim vágesti sem ríður húsum þessa dagana, en ekki því andstöðu og úrtöluvæli sem oft hefur einkenn málflutning VG til þessa.

Steingrímur flutti í raun ræðuna sem ég reiknaði með að forsætisráðherra myndi flytja.  

Glitnisaðgerð ekki endapunktur

Athugasemdir

[Hallgrímur Axelsson (IP-tala skráð) 3.10.2008 kl. 00:47]

Mér fannst þeir meira og minna allir vera að hræra í sömu súpunni. Og ég eiginlega skil ekki hversvegna menn eiða tíma í að segja sama hlutinn með mismunandi orðum. Það sem ég hinsvegar sá úr þessum ræðum er að flestir reyna að nýta sér ástandið í að koma sjálfum sér og sýnum hugsunarhætti á framfæri og traðka á þeim sem situr við völdin frekar en að þjappa hópinn saman og vinna samtaka í að leysa þetta stóra vandamál sem þjóðin er að ganga í gegnum.

Ég fæ það á tilfinninguna að menn séu að reyna að rembast svolítið við staurinn eins og rjúpan og ætli sér að ræða sig eða hugsa sig úr vandanum, líkt og að ég þyrfti að moka sjó af gangstéttinni hjá mér og reyndi að hugsa snjóinn í burtu, en að sjálfsögðu gerist ekkert fyrr en ég gríp í skófluna. Hvernig væri það að hætta þessu bulli og taka til hendinni, það hefst ekkert út úr því að tala um vandamálið.

[Axel Jóhann Hallgrímsson, 3.10.2008 kl. 00:54]

Það er akkúrat það sem þarf, sonur sæll, að taka til hendinni. Strúturinn tekur höfuðið upp úr sandinum annað veifið og segir ýmist að unnið sé að aðgerðum eða aðgerðaleysið hafi skilað árangri. Stingur síðan höfðinu aftur í volgan sandinn og ekkert gerist.