Bloggfærslur mánaðarins, apríl 2013

Þjóðin á þetta svo skilið

Það er engum blöðum um það að fletta að  þrír flokkar eru fyrst og fremst sigurvegar kosninganna, Framsókn, Píratar og Björt framtíð. Allir aðrir tapa á einn eða annan hátt. Ólafur Ragnar þarf því ekki að velta hlutunum lengi fyrir sér, hann á aðeins einn kost. Hann hlýtur að kalla Sigmund Davíð á sinn fund og fela honum umboðið til stjórnarmyndundar.

Þó Sjálfstæðisflokkurinn hafi fengið aðeins meira fylgi en Framsókn á landsvísu í prósentum talið, þá er fráleitt að kalla uppskeru flokksins einhvern sigur. Ríkisstjórnin tapaði samtals 18 þingmönnum en Sjálfstæðisflokknum tekst aðeins að bæta við sig 3 þingsætum.

Við þær kjöraðstæður sem Sjálfstæðisflokkurinn hafði til fylgisaukningar, getur uppskeran ekki talist annað en hrein niðurlæging og útkoma flokksins núna jafnvel enn meiri sneypa en úrslitin 2009.

Í ljósi kosningaúrslitanna, útkomu nýrra framboða, þá er deginum ljósara að lækka þarf 5% fylgisþröskuldinn verulega, niður í 1,5 til 2%. En ég sé það samt ekki gerast í þeirri helmingaskiptapólitík sem upp er runnin, þessi hindrun nýrra framboða var sett af fjórflokknum, þeim sjálfum til varnar.

Fátt bendir til annars en stórslysastjórn Framsóknar og Sjálfstæðisflokks sé það sem koma skal. Lítil ástæða er til fagnaðarláta eða hamingjuóska af því tilefni. Hætt er við að mörgum muni þykja þröngt fyrir sínum dyrum þegar sú stjórn tekur að útdeila sínu réttlæti.

Þjóðin átti völina - nú á hún kvölina. Hún á þessa stjórn fyllilega skilið.

Verði okkur að góðu!

  


mbl.is Geta myndað stjórn með 51% fylgi
Tilkynna um óviðeigandi tengingu við frétt

Lítið gleður vesæla

Framsóknarflokkurinn er ótvíræður sigurvegari kosninganna. Því verður ekki á móti mælt að Samfylkingin fær skelfilega útreið. Því var látlaust haldið fram af stjórnarandstöðunni í kosningabaráttunni að Björt framtíð væri útibú frá Samfylkingunni. Ef þeir halda því enn fram þá er sameiginleg útkoma flokkana hreint ekki sem verst.

En hvernig sem því líður þá er Samfylkingin ekki sá flokkur sem fær verstu útreið kosninganna.  Sjálfstæðisflokkurinn er ótvírætt flokkurinn sem fær háðunglegustu útkomuna.

Við kjöraðstæður, eftir 4 ár í stjórnarandstöðu, við mestu efnahagsþrengingar Íslandssögunnar, aðstæður sem höfðu alla burði til að færa Sjálfstæðisflokknum, rétt eins og Framsóknarflokknum, glæsilega kosningu, þá virðist Sjálfstæðisflokkurinn  rétt ætla að slefa yfir það fylgi sem hann fékk í síðustu kosningum, sem var langversta útreið flokksins frá upphafi.

Svo kalla fíflin þetta sigur og formaðurinn, sem veit ekki hvort hann er að koma eða fara, er þakklátur og ánægður, ja-hérna.

  


mbl.is „Viljum vera leiðandi flokkur“
Tilkynna um óviðeigandi tengingu við frétt

Gagn og gaman

Það er víst venja að stofna bókasafn í nafni hvers Bandaríkjaforseta þegar hann hefur látið af störfum. 

Ef efnistök og umfang þessara forsetasafna tækju eingöngu mið af getu, gáfum og frammistöðu viðkomandi forseta væri sennilega aðeins ein bók í Bushbókasafninu – Gagn og gaman!

Og þætti samt nokkuð langt til seilst.


mbl.is Fimm forsetar voru viðstaddir
Tilkynna um óviðeigandi tengingu við frétt

Stéttarfélag gangstera

Samkvæmt 4. gr laga um kosningar til alþingis eru allir kjörgengir til Alþingis sem hafa kosningarétt,  nema tveir hópar manna. Fyrri hópurinn eru þeir sem hafa flekkað mannorð og hinn hópurinn eru Hæstaréttardómarar, þessir hópar eru lagðir að jöfnu. Ég legg það í mat hvers og eins hvernig á því stendur.

Frægt er þegar handhafar forsetavalds, sjálfstæðismennirnir Geir Haarde forsætisráðherra, Sólveig Pétursdóttir forseti Alþingis og Gunnlaugur Claessen forseti Hæstaréttar misnotuðu vald sitt í fjarveru forsetans og endurreistu "æru" rummungsins  Árna Johnsen svo hann gæti aftur gengið í sitt stéttarfélag, þingflokk Sjálfstæðisflokksins.

Gunnar Örlyngsson  þingmaður Frjálslindaflokksins missteig sig eitthvað á svellinu og hlaut tveggja mánaða fangelsisdóm, sem hann sat afsér. Hann hélt þingsæti sínu því hann taldist, þrátt fyrir dóminn, hafa óflekkað mannorð, þar sem mannorðið glatast ekki fyrr en við 4 mánaða fangelsi.

Þegar Gunnar snéri aftur á þing, sté í pontu Davíð nokkur Oddson og hélt innblásna vandlætingarræðu þar sem hann gerði endurkomu Gunnars að umtalsefni og taldi óhæfu mikla að tukthúslimir vanvirtu hið háa Alþingi með nærveru sinni. Slíkir ættu að sjá sóma sinn og hypja sig svo þingið mætti halda „virðingu“ sinni.

Einhverjum vikum seinna sagði Gunnar sig úr  Frjálslindaflokknum og gekk í Sjálfstæðisflokkinn. Hver beið þá innan við dyrnar á þingflokksherbergi Sjálfstæðisflokksins með útbreiddan faðminn til að bjóða „glæpamanninn“  velkominn í hóp jafningja, annar en Davíð Oddson!  

Glæponar eru nefnilega illa séðir nema þeir séu fullgildir meðlimir í réttu stéttarfélagi.

  


mbl.is Óflekkað mannorð þarf á þing
Tilkynna um óviðeigandi tengingu við frétt

Bjarni Ben lýsir skoðun sinni af fullkominni einlægni.

 

Margir hafa orðið til þess að gagnrýna Bjarna Benediktsson fyrir þau orð sem hann lét falla í meðfylgjandi myndbandi,  um vesalings ríka fólkið sem er illa haldið og býr við verulega skert kjör vegna tekjuskerðingar í kjölfar hrunsins.

Það er ekki hægt að hnýta í Bjarna fyrir þetta. Þetta er einfaldlega hans innsta sannfæring, kjarninn í hans hugmyndafræði og því sagt í fullkominni einlægni.  Bjarni og Sjálfstæðisflokkurinn hafa auðvitað fullan rétt á slíkri skoðun og stefnu.

Það er hinsvegar stóra spurningin hvort það er af klárri heimsku eða hreinni vorkunnsemi sem fjöldin allur af lágtekjufólki ætlar að skerða enn frekar eigin kjör með því að greiða Bjarna og Sjálfstæðisflokknum atkvæði sitt, svo þeir geti komið bágstöddum auðmönnum til bjargar og betri lífskjara.   

 


mbl.is Ekki nauðsyn á meiri skattahækkunum
Tilkynna um óviðeigandi tengingu við frétt

Hræsnarar andskotans

Það er alltaf sama sagan hjá þessum sjálfskipuðu umboðmönnum Guðs.

Þrátt fyrir allan trúarboðskapinn bólar lítið á umburðalyndinu, kærleikanum og fyrirgefningunni hjá þessum orðsins krossförum.

Þess í stað flóir hroki, dramb og sjálfsdýrkun yfir alla barma.

   


mbl.is Krefst brottvikningar Sigríðar
Tilkynna um óviðeigandi tengingu við frétt

Strikið dregið fast upp við eigið rassgat

Náttúruverndarsamtök Suðvesturlands mótmæla harðlega áformum Vegagerðarinnar og bæjaryfirvalda í Garðabæ við gerð nýs Álftanesvegar. 

Náttúruvernd er vitaskuld af hinu góða, en það er hæglega hægt að ganga of langt í því eins og öðru.

Ættu ekki þeir ofurnáttúruverndarsinnar, sem vilja undantekningalaust vernda allar ósnertar þúfur og hraunnibba landsins, að vera sjálfum sér samkvæmir, ganga á undan með góðu fordæmi og rífa húsin sín og skila lóðunum ásamt vegakerfi og öllu öðru sem þeim tengist aftur til náttúrunnar?

Væri það ekki góð byrjun eða er það til of mikils ætlast? Eða draga náttúruverndarsinnar línuna einungis fast upp við eigið rassgat?


mbl.is Framkvæmdum í Gálgahrauni harðlega mótmælt
Tilkynna um óviðeigandi tengingu við frétt

Minning

Bostonborg hefur undanfarna daga verið í sannkölluðu umsátursástandi og íbúarnir skelfingu lostnir og nánast í felum frá því hryðjuverkið var framið þar fyrir nokkrum dögum. Það er umhugsunarefni að aðeins tveimur mönnum skuli hafa tekist að setja Bandaríkin gersamlega á hliðina í nokkra daga.

Óhæfuverk þessara tveggja manna var skelfilegur atburður og enginn ætti að þurfa að eiga slíkt yfir höfði sér. Bandaríkjamenn hljóta því, í ljósi þeirrar skelfingar sem þessir tveir hryðjuverkamenn ollu í samfélaginu í Boston og reyndar Bandaríkjunum öllum, að íhuga hvernig íbúum þeirra landa líður, þar sem Bandaríkin telja sig þurfa að fara um „frelsandi hendi.“

Í borgum og sveitum Afganistan og annarra landa eru það ekki bara tveir menn á ferð með heimagerðar sprengjur sem ógna lífi, heilsu og sálarró íbúanna. Nei þar fer um her manna eyðandi hendi, útbúinn hátækni morðtólum bæði í lofti og láði og láta sprengjum og skotum rigna yfir allt sem fyrir verður, þjóni það  „verkefninu“.

Manntjónið í hryðjuverkinu í Boston, þó skelfilegt sé,  er vart í frásögur færandi í samanburði við manntjónið í flestum „frelsisaðgerðum“ Bandaríkjahers. Ekki eru nema tvær vikur síðan tvær konur og tíu börn voru myrt í loftárás herja NATO í Afganistan.

Þess varð ekki vart að það raskaði ró nokkurs manns í Boston eða annarstaðar þar vestra.


mbl.is Íbúar Boston í spennufalli
Tilkynna um óviðeigandi tengingu við frétt

Sagnfræðileg rannsókn á framtíðinni

Guðni Th. Jóhannesson sagnfræðingur hefur opinberað ítarlega  sagnfræðirannsókn sem hann hefur gert á því tímaskeiði sem gengur í garð að loknum komandi kosningum.  Rannsókn Guðna bendir eindregið til þess að illa muni ganga að mynda ríkisstjórn, kjósi kjósendur ekki rétt.  

Guðni er klárlega að koma því á framfæri við kjósendur að atkvæði greidd öðrum en Framsóun og Sjálfstæðisvafningum sé ávísun á stjórnarmyndunarvandræði.  .......og hver vill það?

Þetta verklag Guðna er auðvitað til fyrirmyndar og sparar mikla vinnu. Með því að stunda sagnfræðilegar rannsóknir á framtíðinni er hægt að hafa allar sagnfræðilegar niðurstöður framtíðar klárar löngu áður en framtíðin verður orðin að nútíð, hvað þá fortíð.

Undarlegt er að engum sagnfræðingi hafi dottið þetta snilldar verklag í hug fyrr!

  
mbl.is Loðin svör við loðnum spurningum
Tilkynna um óviðeigandi tengingu við frétt

Vændislaust Ísland! - Er óneitanlega dulítið Framsóknarlegt markmið

Það eina sem þarf til að gera Ísland að vændislausu landi er að Framsóknarflokkurinn taki málið upp á sína arma og geri það að kosningamáli. Framsóknarflokkurinn hefur aldrei verið feiminn að lofa óframkvæmalegum hlutum.

Framsóknarflokkurinn lofaði okkur t.a.m. vímuefnalausu Íslandi árið 2000. Framsókn afgreiddi það kosningaloforð á sama hátt og önnur slík, jafnan.  „No problemo!“

Allsherjar Framsókn Íslands er að hefjast, góðir hálsar. Við erum ekki að tala um einhvern skitinn „Framsóknar áratug“ framundan, nú tölum við í öldum.  „Framsóknar öldin“ er að ganga í garð.

Verði okkur að góðu!

  


mbl.is Tekst Íslandi að útrýma vændi?
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband