Gefið á garðann

Það er kómískt að koma í búðir á laugardögum og virða fyrir sér atganginn við nammibarinn. Sú sýn minnir mig á gamla tíð, þegar ég stóð varla út úr hnefa og fór í fjárhúsin með honum afa mínum og nafna á Læk á Skagaströnd.

Atgangurinn í börnunum þegar þau troðast til að raða sér á sælgætisgarðann var ekki ólíkt kindunum hans afa þegar þær tróðu sér á garðann jafnóðum og gefið var á hann til að komast sem hraðast í töðuna.

Hitt er líka kómískt, af hverju það er tvöfallt  dýrara að versla sælgæti aðra daga en laugardaga? Ekki er mjólkin ódýrari á mánudögum en aðra daga eða súpukjötið ódýrara á fimmtudögum en aðra daga í þessum sömu verslunum.

   

Nammi selt hér í tonnavís

Athugasemdir

[Kristján Blöndal (IP-tala skráð) 31.3.2012 kl. 10:42]

Skemmtileg samlíking hjá þér Axel,en hið nöturlega er samt,að sykursýki er orðinn faraldur í heiminum,væntanlega bara þar sem velmegun ríkir.
Blessuð börnin eru fórnarlömb markaðs og sölustarfs og foreldrarnir spila með.

[Axel Jóhann Hallgrímsson, 31.3.2012 kl. 11:04]

Ég er ekki fráhverfur þessum svokallaða nammidag Stjáni. Ístöðulausum foreldrum kann að vera nokkur hjálp í slíku fyrirkomulagi. En forsendur verðleggingarinnar skil ég ekki. 

[Sindri (IP-tala skráð) 31.3.2012 kl. 13:05]

Það er nú bara þannig að það er ekkert gott að borða nammi á hverjum degi, held að flest allir þekkji "nammidaginn" laugardaginn finnst ekkert að því að stuðla að því að nammi sé frekar keypt á laugardögum en aðra daga.

[Axel Jóhann Hallgrímsson, 31.3.2012 kl. 13:12]

Heldur þú Sindri að verðlagning verslananna sé einhver háþróuð neyslustýring á nammi?

[Tómas Waagfjörð, 31.3.2012 kl. 14:58]

Veit ekki með ykkur, en ég hef séð fólk hnerra, frussa og í örfá skipti hrækja í nammibar. Sama með hlaðborð.

Vegna þess kaupi ég ekki nammi úr nammibar og lít ekki við hlaðborði nema ég sjái fyllt á það. 

En hey, each to their own.

[Páll (IP-tala skráð) 1.4.2012 kl. 23:07]

Reyndar finnur þú svona verslunarhætti með aðrar vörur í versluninni Kosti.

Þar kostar nautahakkið 697 kr/kg á mánudögum. Mjólkurlítrinn 80 kr. á þriðjudögum. Ferskur kjúklingur á 589 kr./kg. á miðvikudögum. Það er 50% afsláttur af grænmeti á fimmtudögum og fjórir grillborgarar með brauði og tveggja lítra Pepsi kosta kr. 699 á föstudögum.

Mér finnst þetta ansi sniðugt, enda mæti ég iðulega á þriðjudögum að kaupa vikuskammtinn af mjólk ofan í fjölskylduna.

Verst að það sé engin bensínsala með svona vikudagstilboð.

[Axel Jóhann Hallgrímsson, 1.4.2012 kl. 23:55]

Ég hef aldrei komið í Kost. Þarna sést álagningin berlega Páll, ekki trúi ég að vörurnar séu seldar með tapi.

[Páll (IP-tala skráð) 2.4.2012 kl. 00:38]

Það er ugglaust lítið mál fyrir þig að finna út heldsöluverðið á mjólkurlítranum hjá MS. Ég hef það ekki tiltækt en hef nú grun um að hagnaðurinn af mjólkursölunni á þriðjudögum í Kosti sé nú ekki mikill.

[Axel Jóhann Hallgrímsson, 2.4.2012 kl. 00:56]

Afsláttur á vöru eins og t.d. mjólk er notuð til að draga fólk inn í búðina og "tapið" tekið í öðrum vörum. Kostur hefur af einhverjum ástæðum ekki viljað taka þátt í verðkönnunum ASÍ.

[Páll (IP-tala skráð) 2.4.2012 kl. 19:41]

Nákvæmlega. Þetta er einmitt það sem er líka að eiga sér stað í nammisölunni á laugardögum. verið er að draga fólk í búðina og taka út "tapið" með sölu á öðrum vörum.

[Axel Jóhann Hallgrímsson, 2.4.2012 kl. 19:55]

Ég held Páll, að nammi sem allstaðar er á hálfvirði á laugardögum sé ekki líklegt til að trekkja að á einum stað frekar en öðrum.

[Páll (IP-tala skráð) 2.4.2012 kl. 20:39]

Nei, enda staðan í nammisölubransanum birtingarmynd þess að verslanirnar hafa jafnað möguleikana svo ekki sé leitað í eina verslun framyfir aðra.