Enginn aur aflögu, því miður vinur!

„Það er ekki hægt að nota útreikninga Hagstofu Íslands sem grundvöll  fyrir skattlagningu á sjávarútveginn“, segir Einar Kr. Guðfinnsson fyrrverandi sjávarútvegsráðherra.

En mætti þá nota ársreikninga útgerðanna til þess, Einar? 

Við hliðina á fréttinni um viskubrunninn  Einar Kr. Guð á mbl.is, var önnur frétt hún var um aðalfund HB Granda og er sláandi dæmi um hve illilega útgerðarfélögin hanga á horriminni.

Þar segir m.a.:

 

"Aðalfundur HB Granda samþykkti að greiða hluthöfum sínum um 679 milljónir í arð. Félagið hagnaðist um 6 milljarða á síðasta ári. Arðgreiðslan nemur því um 11,3% af hagnaði ársins".

Það er greinilega ekkert svigrúm í þessum tölum fyrir arðgreiðslur til eiganda auðlindarinnar, sem HB Grandi nýtir og byggir á hagnað sinn og arðgreiðslur til eigenda sinna.

  

Ekki grunnur til skattlagningar

Athugasemdir

[Ásthildur Cesil Þórðardóttir, 14.4.2012 kl. 18:11]

Þetta er frábært Axel  Alveg á kúpunni greyin.

[Axel Jóhann Hallgrímsson, 14.4.2012 kl. 18:22]

Það er spurning hvort eitthvert góðgerðarfélagið starti ekki aumingjasöfnun fyrir LÍÚ?

[Ásthildur Cesil Þórðardóttir, 14.4.2012 kl. 18:26]

Hahaha já rauðikrossinn ef til vill  Þetta er á svo stórum skala sjáðu.

[Axel Jóhann Hallgrímsson, 14.4.2012 kl. 18:34]

Afkoma útgerðanna er auðvitað í hamfaraástandi eða rúmum 9 á LÍÚ skalanum, sem er samsvarnadi Richterskalanum.

[Hreinn Sigurðsson, 14.4.2012 kl. 19:17]

Skoðaðu afkomu útgerða í þínu byggðarlagi. ÉG held að þær þoli fæstar þann skell sem þær fá af þessu frumvarpi.

[Ásthildur Cesil Þórðardóttir, 14.4.2012 kl. 19:25]

Vorkenni mest smábátaúterðum sem hafa spilað með og keypt sér aflaheimildir, það þarf að gera eitthvað til að aðstoða þá.  Sennilega afskrifa skuldir á móti kvótaeign.  En grátur og krókódílatár stórútgerðarinnar er ekki trúverðug.

[Axel Jóhann Hallgrímsson, 14.4.2012 kl. 19:34]

Hreinn, á ekki gjaldið einmitt að vara afkomutengt? Það fer svo tvennum sögum af afkomu útgerða í Grindavík, ef það er það sem þú vísar til.

[Axel Jóhann Hallgrímsson, 14.4.2012 kl. 19:35]

Það er rétt að hafa í huga að sá þykir lítill búmaður sem ekki barmar sér.

[runar (IP-tala skráð) 14.4.2012 kl. 20:05]

Gjöld til ríkisins frá útgerðinni finnast á fleiri stöðum en í auðlyndagjaldi.

Skatttekjur frá starfsmönnum, sem oft eru tekjuháir (sökum þess að þeir vinna hátt í 400 tíma á mánuði), gefa vel af sér í ríkiskassan, tala nú ekki um þegar sjómannaafsláttur verður ólöglegur.

Afleidd störf í tengslum við útgerð eru feikimörg, ætli verðið á einum gils sé ekki 100-200 þús kr, síðan þeir sem þjónusta skipin, þeir eru ekki ódýrir, allt sem selt er til útgerðar er fáránlega dýrt.

Þú tiltekur HbGranda, stærsta útgerðarfyrirtæki landsins, finnst þér mikið að þeir hagnist um 6 milljarða á ári, á þessum tímum þegar afurðaverð og gengi vinna fullkomlega með útfluttningi ?

Grandi er í feikimiklum fjárfestingum núna á frystitogaraflota sínum og efa ég að hagnaður og arðgreiðslur verði stórar fyrir þetta ár.

Aldrei hélt ég að ég tæki málstað útgerðarmanna en telur þú Axel að betra væri að útgerðin væri án hagnaðar ?

Mér er jafnilla og þér við misnotkun á aflaheimildum en ert þú sammála þeim sem vilja innkalla kvótann ?

Skagaströnd yrði íklega einungis til í sögubókum ef sú vitleysa yrði ofaná...

Kerfið er rangt í eðli sínu en skítinn er að finna í upphafi þess, síðan þá hefur mikið vatn runnið til sjávar.

Ætli 95% af upprunalegum gjafakvóta hafi ekki skipt um hendur.

Útgerðin er mjög skuldsett, það er ekki spurning, hver sem ástæðan er, ég tel þó að nú sé ekki réttur tími til að ganga hart gegn henni, sá tími kemur seinna, er Ísland hefur náð vopnum sínum að ný.

[Axel Jóhann Hallgrímsson, 14.4.2012 kl. 20:18]

Enginn ætlar atvinnurekstri að þrífast án hagnaðar runar. Aðeins er verið að tala um eðlilega arðgreiðslu til samfélagsins. Telur þú að útgerðarfélag með 6 MILLJARÐA HAGNAÐ sé ekki aflögufært um krónu?

Það skiptir engu hvernig kvótinn hefur skipt um hendur. Alla tíð hefur það staðið skírt í lögum að þessi sami kvóti væri sameign þjóðarinnar. Menn versluðu einfaldlega með það sem þeir áttu ekki. (.)

[sigkja (IP-tala skráð) 14.4.2012 kl. 20:27]

Ég veit líka um ellilífeyrisþega sem er með tvær milljónir á mánuði. Það er sláandi dæmi um hve illilega ellilífeyrisþegar hanga á horriminni. Ellilífeyrisþegar ættu að geta greitt nokkur hundruð þúsund á mánuði hver í aukaskatt.

[Axel Jóhann Hallgrímsson, 14.4.2012 kl. 20:33]

..og eru þessir ellilífeyrisþegar ekki skattlagðir sem skyldi? Eða telur þú um stórfeld skattsvik sé um að ræða? Væri þá ekki rétt að tilkynna það sigkja?

[sigkja (IP-tala skráð) 14.4.2012 kl. 20:48]

Og eru útgerðarfyrirtæki ekki skattlögð sem skyldi? Borga þau ekki fulla skatta og öll gjöld til ríkisins? Eða ertu að segja að útgerðarfyrirtæki stundi stórfelld skattsvik og þess vegna sé réttlætanlegt að nota eitthvað meðaltal eða tekjur þess tekjuhæsta til viðmiðunar?

[Axel Jóhann Hallgrímsson, 14.4.2012 kl. 21:25]

Þau hafa auðvitað greitt sína skatta samkvæmt lögum fram að þessu, er einhver að mótmæla því,  frú útgerð?

Það er aðeins verið að tala um að skattar og auðlindagjald útgerðarinnar verði í samræmi við greiðslugetu og umsvif hvers um sig. En auðvitað vill enginn greiða neitt, allir hinir eiga að gera það, ekki satt?

[sigkja (IP-tala skráð) 14.4.2012 kl. 21:33]

Til dæmis má benda á það að hluthafar HB Granda, sem nú fá 679 milljónir, greiða 563 milljónir í skatt af eigninni og arðinum. Hefði illa árað og enginn hagnaður og arðgreiðslur hefðu hluthafar sjálfir aðeins þurft að greiða allt að 290 milljónum fyrir að eiga hlutabréf. Auk þess sem HB Grandi greiðir ætíð fulla skatta og gjöld af eignum og tekjum hvernig sem árar eins og önnur fyrirtæki og þau aukagjöld sem lögð eru á sjávarútvegsfyrirtæki.

[sigkja (IP-tala skráð) 14.4.2012 kl. 21:40]

Það er nefnilega ekki verið að tala um að skattar og auðlindagjald útgerðarinnar verði í samræmi við greiðslugetu og umsvif hvers um sig. Útgerðarfyrirtækin eiga að greiða aukaskatt þegar vel árar í greininni ekki þegar vel árar hjá hverju fyrirtæki fyrir sig. Þannig að góðæri hjá HB Granda og Samherja getur kostað smáutgerðir úti á landi sem berjast í bökkum hundruði milljóna. 

[runar (IP-tala skráð) 14.4.2012 kl. 23:25]

Það skiptir engu hvernig kvótinn hefur skipt um hendur. Alla tíð hefur það staðið skírt í lögum að þessi sami kvóti væri sameign þjóðarinnar. Menn versluðu einfaldlega með það sem þeir áttu ekki.

Þetta eru þín orð Axel...

Hverjir gáfu útgerðarmönnum leyfi til að versla með kvóta ?

Eru það ekki þeir sömu og íhuga að innheimta þennan sama kvóta sökum þess að það er líklegt til atkvæðaveiða ?

Ef LÖGLEGT var að sýsla með kvóta fram og aftur, skuldsetja sig fyrir kaupum eða veðsetja sig til að losa fé, þá hlýtur varan sem sýslað var með (aflaheimildirnar) að vera löglegt ígildi verðmæta fyrir viðkomandi handhafa og allt ferlið var sannarlega blessað af ríkinu.

Finnst þér eðlilegt að ríkið taki allt í einu þá ákvörðun að innkalla kvótann því almennur meðbyr er fyrir því ?

Ef svo, finnst þér þá í lagi að ríkið taki allt í einu þá ákvörðun að sala fasteigna fyrir árið 2012 hafi verið ólögmæt viðskipti og því þurfa þeir er keyptu fasteign fyrir 2012 að afhenda eigur sínar ríkinu og eigurnar fari á uppboðsmarkað þar sem þú getur keppt við aðra um notkunarrétt þeirra ?

Allt þetta ferli án þess að ríkið bæti þér upp upprunalegu skulbindingu þína fyrir kaupum á fasteigninni í upphafi....hvar er réttlætið í þessari sögu ??

Er þetta ekki sambærilegt ef grannt er skoðað ?

[Axel Jóhann Hallgrímsson, 15.4.2012 kl. 10:32]

Það er merkilegt runar að fylgjendur óbreytts kerfis tala aðeins um að kvótinn verði innkallaður (þeir nota þó önnur orð), en forðast það eins og heitann eldinn að nefna það einu orði að honum verður að sjálfsögðu úthlutað aftur, en undir öðrum formerkjum.

Það stendur ekki til að leggja niður sjósókn á Íslandi.

[Axel Jóhann Hallgrímsson, 15.4.2012 kl. 10:37]

Það er undarlegt sigkja, að eigendur fyrirtækjanna skuli taka arð út úr fyrirtækjunum, ef hann fer allur í skatt! Heldur þú að þessi málflutningur sé ekki eitthvað málum blandinn, þó ekki væri nema í ljósi þess hvaðan hann kemur?

Hjá hvaða útgerð vinnið þið runar?

[sigkja (IP-tala skráð) 15.4.2012 kl. 11:54]

Staðreyndirnar tala sínu máli, hversu undarlegt sem þér kann að þykja það. Skattlanging hefur áhrif á rekstur. 

Það er undarleg árátta að halda að allir sem benda á veiluna í dæmunum og rökleysuna í málflutningnum séu ljúgandi hagsmunaaðilar. Hvort sem það er sú staðreynd að það hefur áhrif á útgerð að hækka skatta eða að tekjur þess tekjuhæsta eru ekki nothæft viðmið til skattlagningar greinarinnar.

Þegar frekja, græðgi og öfund ráða afstöðu fólks kemst ekkert annað að en hvernig hægt er að taka meira og helst allt. Ef einn græðir á að hækka skatta á alla.

Það stendur ekki til að leggja niður sjósókn á Íslandi... bara gera hana óarðbæra öllum nema þeim stærstu og stöndugustu! Og því fagnar þú!

[Axel Jóhann Hallgrímsson, 15.4.2012 kl. 12:21]

Það er nú þannig sigkja, að nafnlaus skrif og gagnrýni er ekki marktæk, því eitthvað er verið að fela með nafnleysinu. Ég fékk um daginn harða gagnrýni á skrif mín um þessi mál. Það kom á daginn að gagnrýnandinn var starfsmaður Samherja, en ég virði og tek mark á því sem hann hafði að segja, því hann var sá maður að skrifa undir nafni og standa þannig við það sem hann hafði fram að færa. 

Komdu fram undir nafni sigkja og ég mun taka það alvarlega sem þú hefur að segja, fyrr ekki.

[sigkja (IP-tala skráð) 15.4.2012 kl. 12:41]

Þegar rök þrýtur og málstaðurinn er tapaður er furðu algengt að menn fara að hnýta nafnleyndina. Þá loksins verður nafnleyndin að aðalatriði þegar ekki er hægt að hrekja rökin. Þegar staðreyndirnar tala er svarað með persónulegum ásökunum sem hafa ekkert með málið að gera.

Nafnleyndin virkar fyrir mig. Hún veitir mér góðan mælikvarða á hvernig fólki ég er að skrifa.

[Axel Jóhann Hallgrímsson, 15.4.2012 kl. 12:51]

[runar (IP-tala skráð) 15.4.2012 kl. 16:30]

Sæll Axel.

Í dag vinn ég hjá Granda.

Ekki að það skipti nokkru máli, ég er bara leðurhaus á dekkinu og veit ekki einu sinni hverjir eiga fyrirtækið.

Eitt sinn vann ég hjá Skagstrendingi líkt og þú, sem skiptir að sama skapi nákvæmlega jafn litlu máli og hvar ég vinn í dag.

Ég er einungis að benda á óréttlætið í því að innkalla kvótann til þess að úthluta honum aftur.

Ef þú hefðir lesið fyrri svör mín við þínum pistli þá hefðir þú séð að ég útskýri ítarlega hvað mér finst rangt við þessa aðferðafræði, kom meira að segja með dæmi með húseigendur, dæmi sem mér finnst ekki fjarri lagi í sambandi við eignarupptöku verðmæta, verðmæta sem fólk eða fyrirtæki hafa borgað fyrir í góðri trú.

Það er rétt hjá þér að sjósókn verður ekki lögð niður, málið er hverjir veiða það sem úthlutað er hverju sinni.

Mér finnst að þær útgerðir sem hafa skuldsett sig fyrir auknum aflaheimildum veiði auknar aflaheimildir.

Okkur getur greint á um réttlæti núverandi kerfis en kerfið hefur gengið það langt og lengi að 180 gráðu snúningur gæti orðið tvíeggja sverð fyrir þá er ráðast í það verk.

[Axel Jóhann Hallgrímsson, 15.4.2012 kl. 16:54]

Takk fyrir upplýsingarnar runar, ég met það, þó ég hefði kosið að þú kæmir fram undir nafni.

Auðvitað skiptir það máli í skoðanamyndun í þessu stóra máli hvort menn telja afkomu sína tengda ruglinu eða ekki. Ekkert eðlilegra en það og skiptir þá ekki máli hvort það er þetta mál eða önnur.

Ég gæti allt eins haft aðra skoðun ef Skagstrendingur væri enn til og væri vinnuveitandi minn og hótaði mér því beint og óbeint að atvinnan, afkoman,  framtíðin og beinlínis allt væri í hættu hugsaði ég ekki eins og LÍÚ ætlast til 

Það er nákvæmlega það sem er í gangi. Gerðu, hugsaðu og segðu það sem við viljum - annars........!

Þetta er boðskapurinn.

Er það, það sem við viljum runar?

Þú getur sent mér upplýsingar um hver þú ert á [e-mail] , ég fer að sjálfsögðu með það sem trúnaðarmál. Það er alltaf best að vita við hvern maður talar.

[Ásthildur Cesil Þórðardóttir, 15.4.2012 kl. 17:08]

Axel ég veit að það sem þú ert að segja er sannleikur.  Ég vann í mörg á á kosningaskrifstofu Frjálslyndaflokksins og það heyrði ég margt sem er alveg í samræmi við það sem þú ert að segja.  Einnig þegar ég hringdi í stórútgerð og spurði hvort okkar kandídata mættu koma í kaffinu og ræða málin var þvert nei. Þeir héldu svo sjálfir fund þar sem þeir sögðu fólkinu að ef það kysi Frjálslynda myndu skipin sigla út og koma ekki aftur.  Ég veit um fólk sem ætlaði að vera á listum hjá okkur, en var hótað að ef það sæist sniglast kring um Frjálslynda myndu þeir umsvifalaust missa vinnuna.

Fólk virðist eiga erfitt með að trúa þessu, en það er bara svona. ÞVí miður hafa útgerðarmenn eyðilagt málefnin fyrir öllum hinum sem eru réttlátir og eru að berjast fyrir lífsafkomu sinni. 

Eins og smábátaútgerðarmenn sem hafa þurft að kaupa kvóta, og hinir sem verða að leigja hann af þedssum glæpöamönnum sem geta deilt og drottnað yfir öðrum útgerðum.  Því málið er að það er ekkert fylgst með hvort þeir uppfylla veiðikvótann eða ekki.  Aumkvunarverðast er þetta endalausa væl í þeim að ef þeir fái ekki að halda "eign sinni" þ.e. óveiddur fistkur í sjó, fari allt á hausinn.  Þetta er bara ömurlegt og nú á að festa þennan fjanda í sessi.

[Axel Jóhann Hallgrímsson, 15.4.2012 kl. 18:11]

Takk fyrir þetta innskot Ásthildur, nákvæmlega svona er þetta og lagast ekki því lengra sem það er látið rúlla, svo mikið er víst.

[Ásthildur Cesil Þórðardóttir, 15.4.2012 kl. 18:16]

Nei einmitt, því meiri anstaða við þessa aðila því lengur sem þeir tröllast við að verja sig og sína.

[runar (IP-tala skráð) 15.4.2012 kl. 18:46]

Sæll Axel.

Ég sendi þér sæmilega útlistað CV.

Bestu kveðjur

runar

[Axel Jóhann Hallgrímsson, 15.4.2012 kl. 20:16]

Takk kærlega fyrir póstinn runar, við eigum margt sameiginlegt sé ég. Ég mun svara þér síðar í rafpósti.

[Sigurður Kristján Hjaltested (IP-tala skráð) 16.4.2012 kl. 07:01]

Ég var nú í við vinnu í fiskvinnslu á Vestfjörðum og þetta er algjörlega lýsandi sem þú segir Axel. Það má bara samt ekki segja það.

Kveðja