Fórnarlömb hvað?

Það er strax byrjað að væla hér heima, aumingja saklausu stúlkurnar að lenda í þessu! Fórnarlömb glæpamanna! Það verður að bjarga þeim heim!

Auðvitað vissu þær báðar frá upphafi hvað á spýtunni hékk, eða máttu vita.

Blessunarlega náðu þessi efni ekki þangað sem þeim var ætlað að fara, í æðar annarra ungmenna - segi ég nú bara.

 

Hvattar til að vera samvinnuþýðar

Athugasemdir

[DoctorE (IP-tala skráð) 13.11.2012 kl. 12:17]

Þú verður að hafa samband við lögregluna ef þú veist svona mikið um málið :)

Þetta eru krakkar mar, krakkar skemmdir og ruglaðir eftir langvarandi neyslu, létt að plata/nota þannig manneskjur.

Ég vil að þær læri sína lexíu en klárlega ekki vera alveg geggjaður úr hegningarhug..

[Axel Jóhann Hallgrímsson, 13.11.2012 kl. 12:24]

Hefur þú þurft að horfa á eftir barninu þínu í helgreipar eiturlyfja DoctorE?

[Ingibjörg Axelma Axelsdóttir, 13.11.2012 kl. 12:36]

Ef þetta hefðu verið strákar væri málinu líklegast snúið þannig við, að þetta væru illa upp aldir pörupiltar, fullir af illsku og gróðafíkn.

[Jóhannes Gunnar Þorsteinsson (IP-tala skráð) 13.11.2012 kl. 12:38]

DoctorE, Þær eru 18 ára. Þannig að samkvæmt lögum eru þetta ekki krakkar heldur fullorðnir einstaklingar sem þurfa að taka ábyrgð á gjörðum sínum. (það er að segja, ef að það er rétt að þær hafi vitað um efnin)

Ég hins vegar vona að þær taki út dóm sinn hérna á landi eða allavega í einhverju landi þar sem tekið er á vandamálum þeirra og reynt að hjálpa þeim í staðinn fyrir að loka þær inn í klefa í X mörg ár og síðan henda þeim út í samfélagið meira skemmdum en þær voru fyrir.

[DoctorE (IP-tala skráð) 13.11.2012 kl. 12:44]

Já Axel það hef ég þurft að gera oftar en einu sinni en í dag er allt í góðu og gengur vel

[Hjördís Vilhjálmsdóttir, 13.11.2012 kl. 12:45]

Eru börn og ungmenni stærsti viðskiptvinir kókaínsala ?

Er ekki sagt að kókaín sé dóp ,,ríkra" og/eða  frægra...?

Ef þú værir faðir þeirra , Axel Jóhann,  myndi þér þá líða vel að vita af þeim í 7 mánaða EINAGRUNARVIST ??? Þætti þér þetta þá bara rosa gott á þær og fengju þær þá að heyra " I told you so"...? Væri það stuðningurinn sem þær mættu reikna með frá þér, ef þær væru þínar dætur ?

,,Elskaðu mig mest, þegar ég minnst á það skilið, því þá þarf ég mest á því að halda"- - höf.ókunnur. 

[Þór (IP-tala skráð) 13.11.2012 kl. 12:46]

"Enginn annar hefur verið handtekinn í tengslum við rannsókna málsins."

Langloka er þetta.

Einfaldara væri: "Fleiri hafa ekki verið handteknir vegna málsins."

[Hjördís Vilhjálmsdóttir, 13.11.2012 kl. 12:55]

Ertu íslenskukennari í sjálboðavinnu í Netheimum Þór....? ;o ;o ;o

[Þór (IP-tala skráð) 13.11.2012 kl. 12:59]

Jóhannes, ef þú vilt að það verði tekið á málum þeirra og þeim hjálpað, þá væri viturlegast að forða þeim frá íslenskum fangelsum, takk. Þau mál eru í miklum ólestri hér. Kannski að Svíþjóð gæti boðið upp á betrunarvist sem stendur undir nafni. En ekki Ísland. Ekki Ísland.

[Ásthildur Cesil Þórðardóttir, 13.11.2012 kl. 13:07]

Ég hef þurft að horfa á eftir barninu mínu ofan í þetta fen og allan pakkann, sem betur fer náði hann sér á strik og átti nokkur góð ár, áður en fíknin náði honum aftur og þá í formi læknadóps.  En ég veit alltof mikið hvernig þetta gengur fyrir sig.  Fólk er tælt í neyslu, svo þegar fíknin er orðin það sterk að þau hafa ánetjast, fá þau lánað fyrir dópinu þangað til að tryggt er að þau standast enganveginn álagið, þá er komið að skuldadögum, það getur verið vændi, innbrot, taka á sig sök annara glæpamanna, eða sem burðardýr.  Þessir krakkar eiga ekkert eftir af stolti hvað þá að þau geti leitað sér hjálpar.  Foreldrar þora ekki að hafa samband við lögreglu, því um leið eru börnin gerð að glæpamönnum komast á skrá, og missa þar með öll mannréttindi gagnvart lögreglunni.  Þau fá ekki sömu meðferð og annað fólk, eru meðhöndluð sem trash.  Þeim er oftast allar bjargir bannaðar, út og í fangelsi, uns þau geta ekki meir og taka sitt eigið líf.

Þessi ungmenni á að dæma í lokaða meðferðarstofnun þar sem að þeim er hlúð og þau fá tækifæri til að komast upp úr helvítinu.   Níðingana ætti helst að ná og setja þá í öryggisfangelsi þaðan sem þeir ættu ekki afturkvæmt.  Það er von að fólk sem ekki hefur lent í svona skilji ekki illskuna, hatrið og illviljan sem tilheyrir þessum undirheimum, þetta er ekki bara einhverjar 101 kvikmyndir, þetta er sannleikurinn.

[Axel Jóhann Hallgrímsson, 13.11.2012 kl. 13:07]

Nei auðvitað myndi mér ekki líða vel Hjördís. En á móti kemur margfaldur fjöldi foreldra neytenda sem þjáist. Eigum við að gleyma þeim?

[Axel Jóhann Hallgrímsson, 13.11.2012 kl. 13:10]

Jóhannes hvað er það sem gerir íslenska afbrotamenn óverðuga þess að meðtaka sama atlæti og aðrir glæpamenn í því landi sem þeir brjóta af sér?

[Axel Jóhann Hallgrímsson, 13.11.2012 kl. 13:15]

Ásthildur, takk fyrir þitt sorglega en góða innlegg. Í þessum málum er vissulega hægara um að tala en í að komast.

[DoctorE (IP-tala skráð) 13.11.2012 kl. 13:19]

Hefur þú upplifað svona Axel, hefur þú átt barn sem er í hlekkjum fíknar. Hvað ef þú ættir dóttur sem væri svona komið fyrir, mundir þú bara segja: Gott á þig, loka þig inni sem lengst..
Þetta fólk/krakkar eru fárveikir einstaklingar sem glæpamenn notfæra sér, þeir ganga lausir á meðan "vélmennin" þeirra eru lokuð inni

[Ásthildur Cesil Þórðardóttir, 13.11.2012 kl. 13:25]

Tengdadóttir mín fyrrverandi sem nú er látin ótímabærum dauða, óttaðist á tímabili um líf sitt, par sem hún gisti hjá dó af of stórum skammti, hún sagði að þau hefði verið myrt, en það var bara ekkert gert í því að rannsaka slíkt, því þetta voru jú bara "aumingjar" og "landhreinsun". Þannig er litið á þessa blessaða fólk af yfirvöldum því miður.  Þessu viðhorfi þarf að breyta, tek undir með DoctgorE þetta eru fárveikir einstaklingar sem hafa enga döngun til að bjarga sér sjálf upp úr þessu og alls ekki í ljósi þess hvernig viðhorf stjórvalda gagnvart þeim eru.  þau eru ekki talin með í mannlegu samfélagi.

[Gunnar Th. Gunnarsson, 13.11.2012 kl. 13:26]

Tek undir aths. #1 hjá doktornum

[Hjördís Vilhjálmsdóttir, 13.11.2012 kl. 13:32]

Axel , feður þeirra eru einnig foreldrar neytenda...

En veistu hvort það séu börn og unglingar sem nota mest kókaín, eins og ég skildi innlegg þitt áður...? 

Og þetta er ein afleiðing af neyslu...segir sig sjálft þegar svo skipulagðir og klárir glæpamenn sem földu þetta með ótrúlegum hætti, velja svo ungar stúlkur til að misnota í smygl.

Svo er spurning, hvor er ,,sekari", sá sem kallar eftir eftirspurn eða sá sem uppfyllir hana eða reynir það..? 

[Axel Jóhann Hallgrímsson, 13.11.2012 kl. 13:38]

Auðvitað veistu að ég myndi ekki gera það doctorE, heldur þú, að ég sem faðir, skilji ekki líðan foreldra þeirra?

En ég hef skil líka líðan allra þeirra foreldra, of vel ef eitthvað, sem eiga börnin sem voru markhópur þessarar sendingar, þeir skipta hundruðum. Samúð mín er bara ekki, af gefnu tilefni, til skiptana í svona málum, án þess að ég ætli nánar út í þá sálma.

[Faðir (IP-tala skráð) 13.11.2012 kl. 13:43]

Væri ekki vert að íhuga örlítið í hvað farveg líf þessara stúlkna hefði flotið ef smyglið hefði heppnast.

Ég leyfi mér að efst um að þær hefðu komið heim og hvað þá farið að lifa "eðlilegu" lífi

[Axel Jóhann Hallgrímsson, 13.11.2012 kl. 13:48]

Hjördís, það er útúrsnúningur á eðli vandans og heildarmyndinni að gera það að aðalatri hvort þetta var kókaí eða einhver annar óþverri.

Er þér alvara með lokaspurningunni?

[Axel Jóhann Hallgrímsson, 13.11.2012 kl. 13:48]

Góður punktur faðir.

[Ásthildur Cesil Þórðardóttir, 13.11.2012 kl. 13:57]

Ég skil vel áhyggjur föður og þínar Axel minn.  En hér er verið að fordæma ranga aðila.  Það þarf að ná níðingunum sem stjórna þessu, en ekki peðunum sem eru tældir til að leika með.  Meðan þessar stúlkur eru gripnar, jafnvel vísvitandi, hefur sennilega verið stærri sending á eftir eða undan henni, sem fellur í skuggan af þessari.  Hvaðan fengu stjórnvöld upplýsingar um smyglið?  og af hverju voru þær sendar áfram frá þýskalandi?  Þetta þarfnast allt útskýringar.  Og svo má segja við getum ekki stemmt ána við ósinn.  Það þarf að stemma hana við upptökin, þar sem hin raunverulega glæpamennska fer fram.
Besta og auðveldasta leiðin til þess væri að gefa hass og slík efn frjáls, og láta síðan fíkla fá sín efni á heilsugæslustöðum og apótekum.  Það myndi fljótlega kippa stoðunum undan þessum hundum sem græða á tá og fingri á unga fólkinu okkar.

Það eru að verða breytingar á þessu annarsstaðar og ég er viss um að þess verður ekki langt að bíða að þessi lög verða endurskoðuð.  

Þar sem ég var á ferðalagi í Mexico fyrir nokkrum árum fór fararstjórinn með okkur upp á fjall, þar sem hann sagði að hefði verið flugvöllur fyrir smygl, flugfvöllurinn var eyðilagður, til að forðast smyglið.  En það voru þá bara aðrar ferðir valdar.  Og Mexicóar eru algjörlega búnir að missa tökin á glæpamennskunn, það má segja að mafían stjórni landinu, þúsundir drepnir í hverjum mánuði. 

Hjá okkur er það bara tímaspursmál hvernær þetta fer úr böndunum.

[Faðir (IP-tala skráð) 13.11.2012 kl. 14:08]

"Hvaðan fengu stjórnvöld upplýsingar um smyglið? og af hverju voru þær sendar áfram frá þýskalandi? Þetta þarfnast allt útskýringar"

 Kio Briggs var sleppt á þessum forsendum, en hann var svartur og það var á Íslandi

[hilmar jónsson, 13.11.2012 kl. 14:09]

Tek undir með Ásthildi hér að ofan og ég dáist að því hversu heil, málefnanleg og réttsýn hún kom unda þeim harmleik sem hún sjálf upplifði.

Harmleik sem hlýtur að vera versta martröð allra foreldra.

[Axel Jóhann Hallgrímsson, 13.11.2012 kl. 14:10]

Auðvitað þarf að ná níðingunum Ásthildur, það má ekki skilja mig þannig að ég vilji það ekki. Það er alfarið í höndum stúlknanna að segja til þeirra. En í fæstum tilfellum gera burðardýr það, jafnvel þó þeim sé heitið afsláttur af refsingu.

Það er vafasöm stefna að vilja sýna burðardýrum einhverja linkind, það væru röng skilaboð og auðvelda níðingunum að finna sér burðardýr.

En þá umræðu ætla ég ekki að taka hvort lausnin á vandanum sé að gefa þetta frjálst að einhverju eða öllu leyti.

[Ásthildur Cesil Þórðardóttir, 13.11.2012 kl. 14:22]

Takk HIlmar minn, já það er svo sannarlega sú versta martröð sem hægt er að hugsa sér.  En sem betur fer hef ég öðlast þann þroska að sjá hlutina eins og þeir eru og það hefur verið mér ómetanlegt.  Syni mínum væri heldur enginn greiði gerður með að mér féllust hendur, heldur ekki elskulegri tengdadóttur, þau voru bæði afskaplega yndælar manneskjur og einmitt svo viðkvæmar og þess vegna auðveld fórnarlömb.  Það er nefnilega málið, að þau sem verst verða úti í svona málum eru viðkvæmar sálir, oft listamenn, sem sjá lífið öðruvísi.  Nú hafa þau fengið frið og eina sem ég get gert í þeirra minningu er að reyna að leiðrétta kúrsinn og minnka fordómana gagnvart þeim sem lenda í því sama og þau. 

[Linda Anna Ragnarsdóttir, 13.11.2012 kl. 14:24]

Ég skrifaði í gærkveldi á bloggsíðu Mbl. athugasemdir varðandi viðtalið í Kastljósi í  gærkveldi (mánudag) við tvo feður þessara stúlkna. 

Mér fannst margt mjög einkennilegt við þessi viðtal.   Í fyrsta lagi er annar faðirinn með hulið andlit, alveg svart, sem vakti grunsemdir mínar eftir að hafa hlustað á viðtölin.  Þar var heldur ekki nafn þessa manns.  Ég hef aldrei séð viðtöl í sjónvarpinu við fólk, sem er  með hulið yfir andlitiið nema að þeir séu grunaðir glæpamenn.  Vegna hvers huldi hann andlitið og gaf ekki til nafns?  Þetta hefði Kastljósið átt að útskýra.   Það sama var með föður hinnar stúlkunnar; hann var ekki nafngreindur og hann sagðist búa í útlöndum, en ekki í hvaða landi.   Því er verið að fela þetta allt?  

Annað mikilvægt atriði, sem ég vil að komi fram, er að stúlkurnar hafa framið alvarlega glæpi, og auðvitað er ég fegin að fíkniefnin fundust og komust ekki á markað í Prag.   Ég er á móti því, að Íslendingar og í þessu tilviki íslensk yfirvöld eru að reyna, alla vega vilja fá stúlkurnar sendar heim til Íslands.   Í fyrsta lagi myndu þær aldrei afplána neinn dóm, hér er allt svo frjálslegt og biðlisti til að komast í fangelsi.   Auk þess sé ég engan mun á íslenskum glæpamanni og erlendum glæpamanni, en ef þeir gerast brotlegir við íslensk lög eru þeir líka settir í gæsluvarðhald og fangelsi.   Við eigum ekki að  sóa peningum til að fá íslenska glæpamenn senda til Íslands, og ef þið munið eftir einu tilfelli þegar Íslendingur sem allir voru að vorkenna í Marokkó var sendur til Íslands.  Hann var laus og hélt áfram að fremja brot á Íslandi.

Að lokum vil ég segja, að ég var líka einu sinni 18 ára, en ég var enginn krakki og hefði ekki neytt fíkniefna né farið að flækjast til Brasíliu og hitta einhverja glæpamenn.   Þessar stúlkur vita vel hvað þær voru að gera og þær eiga bara að vera samvinnuþýðar og segja hverjir létu þær fá fíkniefnin.   Ég spyr líka sjálfa mig: Hvað eru mæður þessara stúlkna?    Ég óska þess, að þessir 2 menn sem voru í Kastljósinu komi fram og sýni andlit sín og segi til nafns.  Einnig er Kastljósið ábyrgt fyrir þetta.

[Ásthildur Cesil Þórðardóttir, 13.11.2012 kl. 14:44]

Það kom fram í byrjun Kastljóssinn að feðurnir væru dulkóðaðir vegna stúlknanna Linda Anna.  Málið er þegar þið talið um að þær geti bara sagt frá hverji stjórna þeim, þá er það einfaldlega þannig að þær eru sennilega með hótanir á bakinu að einhverjum ættingja þeirra verði refsað ef þær svo mikið sem ýja að hverjir þeir séu.  Þetta eru engir asnar, þeir hafa tangarhald á fórnarlömbum sínum langt út yfir fíklana sjálfa. 

Það er því borin von að þær þori að segja til. 

Sumt fólk virðist alls ekki átta sig á því hversu alvarlegir þessir glæpir eru, og hversu aðferðirnar eru sóðalegar og hræðilegar. 

Og þó ykkur finnist að þið getið hraunað yfir stúlkurnar, þá skuluð þið muna að þær eiga fjölskyldur, mömmur pabba, afa ömmur, systkini og margt fólk í kring um þær.  Þessu fólki líður örugglega illa að lesa svona að dróttanir, sérstaklega þegar menn tala um að þær komi frá vandræðaheimilum.  Svona ógæfa hendir á hvernig heimilum sem er.  Ekkert síður á heimilum ríkra en fátækra.  Fíkn fer ekki í manngreinaálit.  Auðvitað er besta vörnin að vera vinur barnanna sinna og hafa velferð þeirra í huga og hjarta.  En oftar en ekki eru unglingar í þeim ham að vilja ekki of mikil afskipti foreldra sinna.  Eða jafnvel foreldrarnir treysta þeim og því fer sem fer. 

Ég lít á þetta innlegg þitt Linda Anna sem barnaskap í besta falli, en sýnir um leið þá fordóma sem fólk þarf að ganga í gegnum ofa á sorgina og áfallið að svona er komið fyrir barninu sínu. 

[Kolbrún Hilmars, 13.11.2012 kl. 14:56]

Ætti það ekki að klingja einhverjum viðvörunarbjöllum hjá forráðamönnum, þótt ungmennin séu reyndar orðin sjálfráða, ef þau dvelja langtímum saman erlendis og ferðast um hálfan hnöttinn án sjáanlegra tekna? 

[Hjördís Vilhjálmsdóttir, 13.11.2012 kl. 15:30]

Axel, ef rót vandan er ekki eftirspurn hinna ,,ríku og frægu" eftir kókaíni, hver er þá rótin ? Væri ekki nær að dæma það í meðferð, án þess þó að gera neyslu þeirra ólöglega ?

Og mér þykir skipta máli hvað efni þetta var, því það er þónokkrir í Netheimum sem telja að það séu einnig börn og ungmenni sem annars hefðu þjáðst, hefði þetta ekki verið stoppað. 

Og svo þykir mér rétt að burðardýr fái vægan dóm, mjög vægan, ef þau ná að sjá til þess að upplýsa um þann sem fékk þau í þetta, það ætti að fá þá sem græða á þessu til þess að taka þessi skítajobb að sér sjálfir, en plata ekki að koma fyrir eiturlyfjum , vel földum í farangur þeirra. 7 mánaða EINAGRUNARVIST er ómannúleg refsing fyrir hvern sem er, ekki síst í máli sem á eftir að rétta og dæma í.  Á meðan sitja þeir sem mala gull á þessu dópógeði og pirrast ekki yfir neinu nema fjárhagslegu tapi sínu, skítsama um þræla sína eða fórnarlömb sem burðardýr eru oft og tíðum og án efa í þessu máli. Og þeir ríku og frægu, sem kaupa þetta, ergja sig á hækkandi verði vegna minnkandi framboðs...

[Hjördís Vilhjálmsdóttir, 13.11.2012 kl. 15:33]

Jú  Kolbrún, það kom fram í máli feðranna að það voru áhyggjur vegna þessarar löngu ferðar og annar þeirra sagði, var haft eftir honum á mbl.is að passa sig að skoða vel í töskur sínar og að dóttirin hafi sagt að hún myndi að sjálfsögðu passa það...sem mér þykir sýna að hún / þær vissu ekki neitt hvað var svo ótrúlega vandlega falið  í öllum töskunum.

[Kolbrún Hilmars, 13.11.2012 kl. 15:59]

Bara þetta; allar töskur, er einnig viðvörunarmerki.  Unga fólkið ferðast venjulega með aðeins einn bakpoka ef tilgangur ferðarinnar er eingöngu ævintýraþrá og landkönnun.

Reyndar sá ég ekki sjónvarpsviðtalið og þekki ekki sjónarmið feðranna.  En eflaust hafa foreldrar engin úrræði þegar börnin eru orðin sjálfráða.

[Ingi Þór Jónsson, 13.11.2012 kl. 16:03]

Ásthildur Cesil.

"Ég lít á þetta innlegg þitt Linda Anna sem barnaskap í besta falli". = dregur ekkert úr því sem Linda er að segja, minkar frekar álit fólks á því sem þú segir.

Er þetta hræðilegur harmleikur fjölskinda þeirra. Auðvitað 

Stóðu þær í því sjálfar. Ábyggilega ekki.

Bera þær ábyrgð. já

Þær uðru ekki fyrir bíl, þær lentu ekki í óhappi. Þær fluttu fíkniefni á milli landa.

[runar (IP-tala skráð) 13.11.2012 kl. 16:07]

Hjartanlega sammála þér Axel.

Ég finn mikið til með foreldrum og ástvinum þessara stúlkna en því miður er líkami okkar það illa byggður að við tökum öll stórar ákvarðanir í sambandi við framtíð okkar þegar við erum líkamlega og andlega ekki tilbúin fyrir stórar ákvarðanatökur..á unglingsárunum...tala nú ekki um ef efni eru í hringrásinni.

Ég á bágt með að finna til með þessum stúlkum þegar ég beiti rökhugsun minni en fuck hvað ég finn til með þeim þegar ég leyfi hjartanu að ráða !

[Hjördís Vilhjálmsdóttir, 13.11.2012 kl. 16:13]

Finnst þér Ingi Þór, ungur aldur þeirra og þroskaleysi engu máli skipta ?

Við búum í landi þar sem löggjafinn treystir þeim ekki til að kaupa sér 1 bjór, og reglur Útlendingastofnunar myndu banna þeim að giftast útlendingi og benda þeim á að bíða með slíkt til 25ára aldurs, muni ég það rétt, og rökin eru þroskaleysi. 

Og þetta er á við slys á svo margan hátt, fyrir þær og ástvini þeirra. Hefðu þær pottþétt vitað af þessu ( þær neita báðar sök og ég vil trúa á sakleysi þeirra og biða niðurstöðu dómara), og gert sér grein fyrir afleiðingunum, hefðu þær ekki gert þetta reikna ég með, ekki frekar en sá sem lamast eftir ofsaakstur, hefði keyrt of hratt, vitandi mögulegar afleiðingar þess.

Við getum ekki spólað til baka í lífinu og gert taka 2 og breytt þvi sem betur má fara. En við getum sýnt stuðning og verið góð og kærleiksrík, þegar við vitum að fólk þjáist og er í sorg Og það er frítt að auki ! ;o

[Ingi Þór Jónsson, 13.11.2012 kl. 16:21]

Auðvitað finst mér ungur aldur skipta máli og hef skiptar skoðanir um hvort það á að minka refsinguna eftir því, kem að því seinna.

ég vona svo sannarlega að það komi upp að það hafi einhver óprúttinnir aðilar komið þessu í töskuna þeirra og málið leisist hratt.

en ég efast stórkostlega um það.

það er tvíeggja sverð að minnka fangelsis vist þeirra því þær séu svo ungar, ég vill ekki að þeir sem eru að standa í þessu sjái sér sérstakan leik á borði að senda eins ungt fólk og það finnur í svona bull.

[Axel Jóhann Hallgrímsson, 13.11.2012 kl. 16:31]

Það er greinilega ekki sama hvert sjónarhornið er þegar 18 ára einstaklingar eiga í hlut. Í sumum málum eru þeir sagðir vera börn en í öðrum fullorðið fólk. 

Er það bara illgirni í mér að telja að það ætti að vekja spurningar hjá fólki þegar bláókunnugur maður kostar það í ferðalög vítt og breitt og gefur þeim svo vandaðar ferðatöskur til að taka með heim að það sé ekki gert af góðvild og náungakærleika einum? Hafa 18 ára einstaklingar ekki þroska til að meta það?

Við hvaða aldur eru einstaklingar nógu þroskaðir til að bera ábyrgð á sjálfum sér ef ekki við 18 ára aldur? 20, 25, 30? Aldrei?

[Hjördís Vilhjálmsdóttir, 13.11.2012 kl. 16:49]

18 ára er mjög ungt, og ef það nægir ekki til að fá sér 1 bjór eða þurfa að vera 25 ára til aðfá að giftast útlending, ætti það þá að nægja þeim núna..? ....og að auki í eða hafa verið í neyslu, nei, þær hafa ekki nægan þroska og ég rétt vona að dómarar úti horfi til þess við ákvörðun refsingar, verði þær dæmdar sekar, að hann verði mildari en margir netverjar, taki til sín þeir sem telja sig eiga.

[Kolbrún Hilmars, 13.11.2012 kl. 17:18]

Axel, ungum börnum er innrætt að þiggja hvorki sælgæti né bílfar af  ókunnugum. Hefur reynst vel, sýnist mér.

Ætli það þyrfti ekki að skerpa á þeirri lexíu í efstu bekkjum grunnskólans og umbreyta þar sælgæti í peninga, bílfari í flugfar?

[Axel Jóhann Hallgrímsson, 13.11.2012 kl. 17:40]

Já og halda mætti að þegar börnin eru orðin 18 ára þá skyldu þau til fulls ástæðu þeirra viðvörunarorða.

En kannski þarf að taka það fram sérstaklega að einu gildi þótt "nammið" sé í formi flugferða til framandi staða og loforðum um gull og græna skóga.

[Maynard (IP-tala skráð) 13.11.2012 kl. 17:50]

Rúnar skrifar: "Ég á bágt með að finna til með þessum stúlkum þegar ég beiti rökhugsun minni en fuck hvað ég finn til með þeim þegar ég leyfi hjartanu að ráða !"

Reyndar er mjög auðvelt að finna til með þessum stúlkum hvort sem þú notar rökhugsun eða leyfir hjartanu að ráða...

Þessar stelpur þrífast í heimi sem að við sem samfélag höfum skapað, heimi þar sem samfélagsleg mið og reglur fá ekki fram að ganga heldur ræður frumskógarlögmálið ríkjum. Við sem samfélag erum samsek þegar það kemur að aðstæðunum sem þessar stelpur komu sér í, bara með því að gera þessi efni sem þær ánetjuðust ólögleg höfuð við sett umráð þeirra í hendurnar á siðblindum einstaklingum sem finnst ekkert tiltökumál að starfa fyrir utan samfélagsgjörðina til að afla sér tekna. Þvert á móti virðast slíkir einstaklingar þrífast ótrúlega vel í hörðum heimi ólöglegra vímuefna.

Við sem samfélag höfum gert það að verkum að ungt fólk, oft með brotna sjálfsmynd, lélegt sjálfsálit og uppfullt af sjálfshatri þarf að eiga við þessa sömu siðblindu einstaklinga, einstaklinga sem upp á móti er skítsama hvað verður um þessa fíkla og sjá þau oftast sem lítið annað en framlengingu á eigin löngunum og hvötum. Við höfum sett minnstu sálirnar í samfélaginu í hendurnar á mönnum sem að svífast einskis, og það vill oft gleymast þegar fíklarnir sjálfir eru gerðir að einhverjum ómennskum skrímslum sem eru að brjótast alls staðar inn að oft á tíðum er þetta gert vegna tilstuðla handrukkara sem hafa annars hótað þeim öllu illu.

Svo finnst mér frekar mikil einföldun að halda því fram að þær ættu bara að segja til þeirra sem fengu þær í þetta, en ég efa það ekki að þeim sjálfum hafi verið hótað ef þær segðu frá og jafnvel hótað því að ganga í skrokk á fjölskyldumeðlimum og það er yfirleitt þannig sem að þessir menn vinna. Finna unga, hrædda fíkla sem eru tilbúin að gera hvað sem er til að verða ekki hlekkjuð við eitthvað rúm í einhverju hóruhúsi eða að borað verði í hnéskeljarnar á þeim (fer eftir því hvort fíkillinn er kk eða kvk).

Oft er burðardýrunum líka fórnað (þ.e. að sá sem að sendir þau af stað lætur lögregluna og tollyfirvöld vita) annað hvort af því að það er stærri sending einhvers staðar eða af því að höfuðpaurinn á í nánu sambandi við fíkniefnadeild lögreglunnar og hann fær að vera í friði svo lengi sem að hann "squealar"  um aðra minni fiska og lætur lögregluna líta vel út í blöðunum.

Þannig að fyrir mitt leyti hef ég ekkert nema samúð með stelpunum og foreldrum þeirra, og ég held jafnframt að þær hafi aldrei átt að komast á leiðarenda með þessi efni, þeim var bara einfaldlega fórnað fyrir ofangreindar ástæður.

Ekkert hefur breyst, þeir sem að stóðu fyrir þessu smygli munu bara reyna aftur og aftur og aftur, af því að það er í alvörunni svona mikill peningur í þessum ólöglega markaði sem að VIÐ sem samfélag höfuð skapað. Þessi tilteknu efni komust kannski ekki í hendurnar á einhverjum, en önnur efni munu gera það, fleira ungt fólk mun ánetjast og lenda í nákvæmlega sömu aðstæðum og þessar stelpur og mörgum ykkar mun halda áfram að standa á sama svo lengi sem að þessi tiltekna sending nær ekki alla leið.

Það var erfitt, en ég hef þurft að sætta mig við að búa í samfélagi sem að hefur með skammsýni og fórdómum, búið til bann gegn tilteknum hluta vímuefna sem hefur lagt margfalt fleiri líf í rúst en efnin gætu nokkurn tímann, og það er alveg gríðarlega sárt að hugsa til þess.

[josef asmundsson (IP-tala skráð) 13.11.2012 kl. 17:56]

Verð að taka undir með þeim sem hafa samúð með stelpunum.Auðvitað er þetta meira vandamál en það að hægt er að afgreiða það með sekur/saklaust.í flestum tilfellum er um fjölskylduharmleik að ræða.Það má ekki gleyma því að þegar fólk er komið í neysluna er því ekki sjálfrátt.Það fer að ljúga og stela til að eiga fyrir efninu og ekkert annað kemst að.Ég er viss um að ef þær verða samvinnuþýðar og segja frá hver stendur á bak við bíður þeirra limlestingar af þeim aðila þegar þær losna.Þetta er harður heimur og miskunnarlaus.Það þarf að uppræta vandamálið,ekki fólk- ekki börn.

[Hjördís Vilhjálmsdóttir, 13.11.2012 kl. 17:57]

Hér er linkur á viðtal við Jóhannes Kr úr Kastljósinu, þar bendir hann m.a. á að þeri sem gerðu þær út, eru nú þegar án efa, farnir í að finna fleiri fórnarlömb, og munu sennilegast ekki taka upp veskið til að hjálpa þeim sem nú eru í EINANGRUN í Prag, hvorki fyrir mat þar, lögmannskostnaði né öðru, þó þeir eigi sand af seðlum !!!

http://www.dv.is/frettir/2012/11/13/farnir-ad-finna-naesta-burdardyr-sem-ad-forna/

[óli (IP-tala skráð) 13.11.2012 kl. 18:23]

þetta er bara hörmulegt fyrir aðsandendur þeirra og þær sjálfar. ENN þær vissu hvað þær voru að gera. þær eru ekki þroskaheftar. þetta eru fullráða einsklingar þó svo að þær séu ungar stelpur. þær vissu vel að þær væru að transporta þó þær hafi ekki planað það sjálfar. Afleiðingarnar af slíku vissu þær líka vel hverjar gætu orðið. Svo ekki sé nú talað um ef þær skvíla á þann sem þetta skipulagði. það er lítið hægt að vorkenna þeim finst mér. þær kölluðu þetta yfir sig sjálfar og voru hepnar bara að vera ekki teknar í Ríó með þetta.

[runar (IP-tala skráð) 13.11.2012 kl. 18:29]

Fallegur texti Maynard.

Ég á erfitt með að mótmæla þér...

[Ingibjörg Axelma Axelsdóttir, 13.11.2012 kl. 19:10]

Bara svona til þess að fleygja þessu fram...

Hefur einhverjum dottið það í hug að þessar stúlkur eru ekki mansals fórnarlömb að greiða burtu fíkniefnaskuld, heldur fíkniefnaneytendur í leit að auðveldum gróða?

Ég veit ekki hversu mörg burðardýr þið þekkið, en langflestir þeirra sem ég þekki til hafa gert það í þeim tilgangi. Gróði. Peningar og/eða fíkniefni í aðra hönd.

Hvenær hætta börn að vera börn? Er það ekki við 18 ára aldurinn? Var nú 16 ár fyrir ekki svo löngu síðan.

Fíklar eru ótrúlega sjálfselskar skepnur. Sem óvirkur fíkill ætti ég að þekkja það.

Það eina sem skiptir máli er næsti skammtur. Allar þínar ákvarðanir, öll þín framtíðarplön, alveg sama hvað það er, hefur allt með þinn næsta skammt að gera.

En það er ekki þar með sagt, að maður viti ekki nákvæmnlega hvað maður er að gera.

Auðvitað er alveg hræðilegt að vita af 18 ára stúlkum í einhverju hræðilegu fangelsi í útlöndum. En þær eru ekki saklausar.

Yrði þessu dæmi snúið við ef þetta væri 25 ára karlmaður?

[óli (IP-tala skráð) 13.11.2012 kl. 20:49]

Mikið til í því sem Ingibjörg seigir hér! "Enn þær eru bara svo litlar og sætar angaskinnin" þetta er nú það sem skín voða mikið í gegn í blöðunum. þær eru jafn fullorðnar 18 ára eins og ef þær væru 90 ára. Mann ættu að hugsa um það áður enn grátkórinn byrjar með "börnin heim"

[Anna Lilja (IP-tala skráð) 13.11.2012 kl. 23:21]

Ingibjörg,

"Fíklar eru ótrúlega sjálfselskar skepnur. Sem óvirkur fíkill ætti ég að þekkja það.

Það eina sem skiptir máli er næsti skammtur. Allar þínar ákvarðanir, öll þín framtíðarplön, alveg sama hvað það er, hefur allt með þinn næsta skammt að gera."

"En það er ekki þar með sagt, að maður viti ekki nákvæmnlega hvað maður er að gera."

Fíkill í neyslu veit ekki hvað hann er að gera, hann er á valdi fíknar sem kúgað peð þeirra sem græða. Peðið er fórnarlambið, fórnarlamb geðheilsu sinnar, fíkninnar og þeirra sem græða. Þeir sem græða eru þeir sem skulu gjalda.

[Ingibjörg Axelma Axelsdóttir, 13.11.2012 kl. 23:37]

Ég hafði fulla vitneskju um það sem ég var að gera.

Ég vissi nákvæmnlega að þetta var ekki það sem ég átti að vera að gera. Ég vissi vel að ég var að særa alla þá sem elskuðu mig og vildu hjálpa mér.

Það eina sem skipti mig máli var það sem mig langaði í, í flestum tilfellum var það næsti skammtur, og mér var alveg sama hvern ég þurfti að særa djúpum sárum til þess að nálgast hann.

Það getur vel verið að ég hafi verið afskaplega mikið fórnarlamb. En ég finn miklu meira til með fjölskyldu minni sem þurfti að horfa upp á mig sturta lífi mínu niður í klósettið. Meira en áratug síðar, er ég enn að reyna að bæta fyrir brot mín. Ég á ábyrgðina á þessu, 100%. Enginn annar.

[Ásthildur Cesil Þórðardóttir, 13.11.2012 kl. 23:37]

Alver rétt hjá þér Anna Lilja, svona er þetta.  Það er borin von að fíkill geti grætt og átt peninga.  Hvað þá að hann hugsi svo langt að framkvæma svona ferðalag sjálfur.  ´Fíklinum er þarna algjörla stjórnað með gulrótinni sem er næsti skammtur.

[Linda Anna Ragnarsdóttir, 14.11.2012 kl. 17:24]

Ásthildur,

Ég var að lesa áðan það sem þú skrifaðir sem svar við athugasemd minni frá í gærkveldi.   Í fyrsta lagi, hef ég eflaust rétt misst af þessari kynningu Kastljóss um feðurna, en samt hefði mátt endurtaka það fyrir þá, sem sáu ekki upphafið.

En það sem þú segir um mig tel ég mikla móðgun, að segja að innlegg mitt sé í barnaskapur í besta falli og síðan að það sýni fordóma í garð foreldra o.s.frv..... Ég er menntuð kona, 63 ára gömul, er hálfíslensk ef þú vilt vita um ætt mína, og ég hef búið í ýmsum löndum og frá unga aldri hugsaði ég mikið um réttlæti, og síðar var ég einn af stofnendum Íslandsdeildar Amnesty International, starfaði í 1 ár í höfuðstöðvum Amnesty International í London, verið virk í sænsku deild Amnesty o.s.fr.    Ég hef ávallt barist fyrir mannréttindum.   Ég hef lengi starfað sem túlkur á Íslandi,og víst að nokkrir hér eruð að tala um kærleika og skort á kærleika, þá skal ég segja þér og öðrum, að mér hefur liðið mjög illa, þegar ég hef þurft að túlka fyrir hælisleitanda, sem kemur til Íslands með falskt vegabréf, og er svo sendur í 2 vikna fangelsisvist, en hann hafði enga aðra möguleika til að flýja land sitt, og í mörgum tilfellum hefur hælisleitandinn farið frá Afríkulandi á smábát til Spánar og síðan þvælst einhvern veginn til Íslands, og síðan er hann settur í fangelsi hér á Íslandi, landinu sem átti að vera draumalandið.   Aldrei heyri ég fólk tala um það, nema að fyrir stuttu síðan komst það í fréttir, að Ísland hefur verið að brjóta alþjóðasamning varðandi flóttamenn með því að setja þá í fangelsi fyrir að vera með fölsuð skilríki.   Einnig hafa mál hælisleitenda komið í fréttir og hvernig farið er með þá.   En Ásthildur, þú ert ekki að hugsa um þá eða mynda aðgerðahóp fyrir þá.   Ég var hissa hvað mættu fáir þann 17. ágúst sl. fyrir framan rússneska sendiráðið til að mótmæla fangelsun og þeim réttarhöldum, sem framundan voru á móti Pussy-Riot grúppunni. Það eru alvarleg mannréttindabrot.   Þar eru fangelsin hræðileg. Þú gleymdir að ég nefndi að Íslendingar beittu sér fyrir að íslenskum glæpamanni yrði sendur til Íslands, sem var í haldi í Markokkó fyrir þó nokkrum árum síðan, en svo var hann víst laus og braust inn í heimili, sem ég kannast við.   Ég er sammála þeim, sem hafa skrifað að stúlkurnar eru ekki saklausar, en leyfum réttarkerfinu í Prag að hafa sinn gang.   Ég er ekki ein af þeim sem trúa að fangelsin eigi að vera einhvert fallegt heimili, eins og t.d. Verndarhúsið á Laugateigi 19, þar sem sekir sem þið öll þekkið geta lifað góðu lífi og meira að segja farið í vinnu á lögmannsstofu. Að lokum vildi ég segja, að ég sé eftir að hafa skráð mig á bloggsíðu Mbl. eftir að fá svona ásakanir.   Hvað með mínar tilfinningar?  Ég verð enn að endurtaka, að það að Íslendingar eru með fordóma gagnvart útlendingum, og það kom fram á þingi sem innflytjendur voru á nýlega í Ráðhúsinu. 

[Ásthildur Cesil Þórðardóttir, 14.11.2012 kl. 21:28]

Linda Anna mín það var ekki vilji minn að móðga þig.  En þegar ég las yfir það sem þú sagðir þá var það fullt af fordómum, m.a. um að feðurnir kæmu ekki hreint fram.  Enginn samúð með stúlkunum.

Það er gott að þú hefur kærleika í hjartanu, en hann nær bara til sumra sé ég.  Ég hef fulla samúð með hælisleitendum, reyndar svo að ég get helst ekki lesið um slíkt, því ég verð miður mín í marga daga.  Ég hef sjálf staðið í að aðstoða fólk sem þurfti að flýja föðurland sitt og hef reynt að sinna mínum samfélagslegum skyldum.  En það þýðir ekki að ég geti ekki haft samúð með tveimur stelpukjánum sem hafa glapist á rangar brautir, þekki slíkt afar vel. 

Málið er að kærleikurinn fer ekki í manngreinarálit, og þó ég sé oft harðorð um fólk sem misbýður réttlætiskennd minni eins og til dæmis ísraelsstjórn, þá reyni ég að láta hjartað og kærleikan ráða svona yfirleitt.  Ég bý ekki í Reykjavík svo ég hef ekki getað mætt á mótmælafundi um ýmis réttlætismál.  Það þýðir samt ekki að ég skilji ekki neyðina eins og til dæmis með hælisleitendur. 

Í minni fjölskyldu er fólk frá El Salvados, fólk frá Kenýa, á marga vini í Mexico, og hef aðstoðað stúlkur frá Thailandi, á líka fjölskyldu frá Kolumbíu.  Svo ég er glettilega ágætlega sett hvað varðar fólk frá öðrum löndum.  Það er bara ekkert að ræða um.  Og að þú sjáir eftir að skrá þig á MBL ágæta Linda, þá skal endinn í upphafi skoða, ef þú heldur að allt hér sé dans á rósum, og að þetta sem hér hefur komið fram sé það versta, þá skaltu hugsa þinn gang.

Besta er samt að vera bara trú sjálfri sér, og standa með sinni skoðun.  Þú átt greinilega erindi hér til að verja þá sem hingað koma til að reyna að fá betra lík.  þú ættir ekki að gefa það upp á bátinn svona auðveldlega.

[DoctorE (IP-tala skráð) 16.11.2012 kl. 07:58]

Mér finnst þetta líkjast því þegar menn fyrr á tímum, ekki svo langt síðan, þá tóku menn geðfatlaða og bundu við staur, lokuðu í búrum. Sviðið með fíkla er alls ekki svo ólíkt þessu

[Ásthildur Cesil Þórðardóttir, 16.11.2012 kl. 15:26]

Því miður DoctorE þá hefur þú þarna óhugnanlega rétt fyrir þér.