Við megum ekki spara, okkur til skaða.

 

Til allrar lukku varð ekki manntjón þegar hafn-  sögubátnum hvolfdi við björgun togarans Sóleyjar Sigurjóns af strandstað fyrr í dag.

Varðskipið Týr og Norska varðskipið Harstad náðu togaranum á flot. Óvíst er að það hefði tekist, hefði Harstad ekki notið við. 

Harstad er systurskip nýja varðskipsins Þórs, sem er í smíðum fyrir Landhelgisgæsluna í Chile. Aðkoma Harstad að strandinu sýnir hversu brýn þörfin er orðin á svo öflugu nýju skipi.   

Fiskiskip okkar eru orðin það stór sum hver að varðskipin okkar, ráða hreinlega ekki við svona verkefni. Svo ekki sé talað um stærri skip sem leið eiga um lögsögu okkar.

Það var lán í óláni að strandið varð þegar best var og blíðast. Oftar en ekki eru þær aðstæður að óveður er í aðsigi og aðeins nokkurra klukkutíma svigrúm til aðgerða.

Ef ekki hefði tekist að ná togaranum á flot og strandið fengið á sig storm hefði togarinn sennilega ónýst og þetta smá óhapp orðið að stórtjóni. Ef ekki er til í landinu öflugt björgunarskip, getur það orðið dýrt og of seint ef bíða þarf eftir skipi að utan til bjargar.

Því eru þær hugmyndir, sem heyrst hafa, að nýi  Þór komi ekki hingað heldur verði leigður Norsku strandgæslunni, í sparnaðar skyni, ekki aðeins stórundarlegar heldur beinlínis hættulegar.

Hætt komnir þegar lóðsinn sökk

Athugasemdir

[Jón Snæbjörnsson, 4.6.2009 kl. 21:23]

Mikið til í þessu Axel, ansk fjársvelti alltaf

[Hafsteinn Viðar Ásgeirsson, 5.6.2009 kl. 09:26]

Þetta er auðvitað rétt mat hjá þér. Það er hinsvegar ekki gott að koma auga á leiðir til að galdra fram aura í þessi skipakaup, fremur en annað. Ég held að hér sé ekkert val og að við megum þakka fyrir ef Norar taka að sér þennan pakka.

Og ég held að ég sé bara ekkert sérlega svartsýnn, miðað við það sem við höfum fyrir framan okkur núna.

[Axel Jóhann Hallgrímsson, 5.6.2009 kl. 12:26]

Ég geri ráð fyrir að Ægir hyrfi úr rekstri þegar Þór kæmi. Einhver kostnaðarauki verður auðvitað, en ætti að vera yfirstíganlegur.

Mikill samdráttur í löggæslu til lands og sjávar hlýtur að vera neðarlega á sparnaðarhugmyndalistanum.

[Hafsteinn Viðar Ásgeirsson, 5.6.2009 kl. 15:41]

Nei það er klárt Axel, en trúlega megum við þakka fyrir ef hægt verður að halda sjó eins og málum er komið og náum að ljúga út fyrir eldsneyti á draslið hjá Gæslunni.

Það vill reyndar enginn að neitt sé snert nálægt sér svo þetta verður erfið ganga, mjög erfið því við stöndum klárlega frammi fyrir rosalegum niðurskurði á öllum sviðum.

[Axel Jóhann Hallgrímsson, 6.6.2009 kl. 10:28]

Takk fyrir góð innlegg Hafsteinn, við verðum að vona það besta. Það er erfitt að þurfa að liggja í vörn.