Klæðskerasaumuð afsökunarbeiðni er aumt yfirklór.

Af hverju beið Björgólfur eftir útkomu skýrslu rannsóknarnefndarinnar áður en hann baðst afsökunar? Hann játar núna andvaraleysi gagnvart hættumerkjum og að hafa ekki getað farið eftir hugboði sínu þegar hættan var ljós. Var honum þetta ekki ljóst í síðustu viku eða fyrr?

Já það er einmitt það, nú er komið nýtt og annað hljóð í strokkinn en verið hefur fram að þessu. Hvað ætli Björgólfur hafi verið búinn að gera mörg mismunandi uppköst af þessari afsökunarbeiðni til að hún félli að hugsanlegum mismunandi niðurstöðum rannsóknarnefndarinnar, hvað hann varðaði?

Björgólfur ætlar að gera upp við lánadrottna sína, gott og vel ekkert nema gott eitt um það að segja.

En hvað með þjóðina Björgólfur, sem m.a. fyrir þinn tilverknað, situr uppi með gengisfall krónunnar, stórhækkað verðlag, mesta atvinnuleysi síðari tíma, margföldun á lánum og afborgunum af þeim, niðurskurð á þjónustu ríkisins ásamt öllum þeim andlegu þjáningum sem af þessu leiða?

Hvenær og hvernig ætlar þú að jafna þín mál við þjóðina? Eða á þjóðin að gera sér að góðu þessa aumu klæðskerasaumuðu afsökunarbeiðni, sem er langt frá því að sýnast ærleg, hvað þá meira?

 

Björgólfur biðst afsökunar

Athugasemdir

[hilmar jónsson, 14.4.2010 kl. 09:56]

Nei maður átti ekki von á miklu eða merkilegu úr þessari átt.

Það sem þarf þó að gerast ekki seinna en núna er : 1. þeir alþingismenn sem staðið hafa í lánasukki eða hafa orðið uppvísir að vanrækslu fari frá STRAX.

2. Settur verði forgangshraði á að koma lögum yfir bankamennina og útrásarkrimmana.

3. Sama gildi um embættismenn Seðlabanka og FME.

Öll bið á ofangreindum atriðum eru slæm skilaboð út í þjóðfélagið, ekki síst í ljósi þeirra upplýsinga sem við höfum nú í kjölfar skýrslunnar.

[Guðrún (IP-tala skráð) 14.4.2010 kl. 10:06]

Mér finnst þó virðingarvert að hann skuli biðjast afsökunar, það er meira en aðrir hafa gert! Í stað þess að gera lítið úr afsökunarbeiðinni þá finnst mér að fleiri mættu taka hann sér til fyrirmyndar.

[hilmar jónsson, 14.4.2010 kl. 10:10]

Afsökun er að verða stórlega ofmetið fyrirbæri á Íslandi í dag Guðrún.

Það er hugarfarið að baki og umfram allt, viljin til þess að breyta gjörðum sínum sem telja og skipta máli.

[Axel Jóhann Hallgrímsson, 14.4.2010 kl. 10:16]

Ég er sammála þessu Hilmar, meinið verður ekki læknað nema kreista út gröftinn.

[Axel Jóhann Hallgrímsson, 14.4.2010 kl. 10:24]

Guðrún, afsökunarbeiðni er stórt skref til sátta, en til að hún verði það, þá verður hún að vera einlæg og hugur verður að fylgja máli. Þessi afsökunarbeiðni Björgólfs virkar ekki þannig á mig, fjarri því.

Ert þú þeirrar skoðunar Guðrún, að afsökunabeiðni Björgólfs vegi jafn þungt og verðhækkanir og önnur óáran, sem á þér hafa dunið, af hans völdum?

[hilmar jónsson, 14.4.2010 kl. 10:29]

Eða: Er afsökun sæðsöm í tóman maga ?

[Axel Jóhann Hallgrímsson, 14.4.2010 kl. 10:38]

Litlu mun hann Vöggur feginn - ef hún slær á réttlætis hungur þjóðarinnar.  

[Guðrún (IP-tala skráð) 14.4.2010 kl. 11:22]

Ekki get ég nú kennt Björgúlfi Thor einum um verðhækkanir og vansæld landans, þar koma fleiri að og ekki hafa þeir séð neina ástæðu til að biðjast afsökunar á sínum gjörðum. Ég er mun reiðari við ráðamenn þjóðarinnar heldur en nokkrun tímann Björgúlf Thor enda voru þeir ráðnir af þjóðinni til að vinna henni til heilla - það virðist sem þingmenn hafi allir (mér finnst enginn þeirra saklaus í þessu máli) svikist um í sinni vinnu, í vinnu hjá mér sem kjósanda. Mér fannst vel gert að greina frá því hvaða þingmenn hefðu fengið há lán hjá bönkunum en fannst undarlegt að nefndin skyldi stoppa við 100 milljónir - ég vil að þessar upplýsingar verði gerðar opinberar allt niður í 50 milljónir.

 Afsökunarbeiðni lagar ekki allt en hún er gott skref í rétta átt og Björgúlfur Thor er sá eini sem hefur stigið það skref. Fyrir það á hann hrós skilið. 

[Axel Jóhann Hallgrímsson, 14.4.2010 kl. 11:33]

Guðrún, nei ekki stóð hann einn af því en þáttur hans er langt í því frá lítill. Vissulega bera stjórnmálamenn ábyrgð að hafa skapað þetta umhverfi.

En það afsakar ekki að Björgólfur og aðrir hafa látið greipar sópa um eigur þjóðarinnar og skilið hana eftir gjaldþrota. Ekki frekar en það sé þjófinum afsökun, þegar hann hefur hreinsað út úr íbúðinni þinni, að þú hafir skilið eftir opið!

[Axel Jóhann Hallgrímsson, 14.4.2010 kl. 11:36]

Eftirfarandi var stolið af Vísi.is og bið ég þjóðina afsökunar á því þótt ég hafi ekki í huga að láta af þeirri háttsemi henti það mér.

"Þetta er ekki afsökun heldur afneitun," segir Vilhjálmur Bjarnason, lektor við Háskóla Íslands um bréf Björgólfs Thor Björgólfssonar sem birtist í Fréttablaðinu í morgun. Í bréfinu segist Björgólfur biðjast afsökunar.

"Með því að biðjast fyrirgefningar felst breyting í viðhorfi," segir Vilhjálmur. "En það er ekki að finna hjá Björgólfi. Hans afsökun er réttlæting."

Í grein sinni segir Björgólfur Thor meðal annars: "Hver Íslendingur ber ábyrgð á eigin fjármálum og situr uppi með þær ákvarðanir sem hann tók. Ég er þar engin undantekning."

Vilhjálmur bendir á að fjöldi Íslendinga situr í skuldasúpu af völdum aðgerða manna eins og Björgólfs.

"Eina raunverulega afsökunin væri sú að hann skilaði þjóðinni þeim peningum sem hann hafði af henni. Þetta bréf Björgólfs, sem ég er viss um að hann hefur ekki skrifað sjálfur heldur Ásgeir Friðgeirsson, aðstoðarmaður hans, er ekkert annað en aum réttlæting."

[Guðmundur St Ragnarsson, 14.4.2010 kl. 11:37]

Það er eins og þessi "afsökunarbeiðni" hafi verið samin af PR fulltrúa.

[Ásdís Sigurðardóttir, 14.4.2010 kl. 11:53]

Afsökun my ass, megi hann eta það sem úti frýs