Misskilin atkvæði?

Ég hef látið hafa eftir mér á blogginu að ég telji það ótækt að sjómenn á frystitogurum sem fóru á sjó áður en utankjörfundar- atkvæðagreiðslan hófst 16. mars og koma ekki í höfn fyrr en að loknum kjördegi, séu beinlínis sviptir atkvæðisrétti.

Það hef ég meint út í ystu fingurgóma og því gagnrýnt það af fyllstu sannfæringu.

Í þessu óefni hef ég eignast óvæntan bandamann, fjandvinur minn Jón Valur Jensson hefur ekki dregið af sér og óskapast einhver ósköpin, eðlilega, yfir þessu mannréttindabroti gegn sjómönnum og farið mikinn á bloggum sínum og hist og her.

En Jóni vini mínum yfirsést í einu mikilvægu atriði, þ.e.a.s. laun frystitogarasjómanna eru gengistengd. Það  þýðir með öðrum orðum að falli gengi krónunnar, þá hækka laun sjómannanna lóðbeint í krónum talið, sem gengisfallinu nemur.

Hvað gerist verði Icesave  fellt, jú þá fellur krónan, allir gera ráð fyrir því.

Hvað gerist þá? Jú laun sjómanna sem eru á gengistryggðu kaupi hækka sjálfkrafa! Eru þeir sem við slíkt kerfi búa líklegir til að ganga gegn slíkum freistingum?

Er Jón Valur, að þessu athuguðu,  enn harður á því að fá þessi atkvæði í land?

Athugasemdir

[Jón Daníelsson, 17.3.2011 kl. 02:10]

Flott stríðni - óneitanlega.

En við skulum ekki missa sjónar af réttlætinu - nefnilega því að fresturinn sé nógu langur til að sjómenn geti líka kosið, jafnvel þeir sem eru afla okkur tekna í "Smugunni" milli Norður-Noregs og Norður-Rússlands. Sem sagt "norður í Ballarhafi". Það réttlæti verða menn að virða.

Ég dreg í efa að nafni minn virði þig svars. Mér sýnist hann frekar vilja skrifast á við vini sína :-)

En við sjáum til.

[Axel Jóhann Hallgrímsson, 17.3.2011 kl. 02:51]

Jón nafni þinn er ólíkindatól, óneitanlega. Hann lét svo lítið að koma til svara við síðustu færsluna mína, sem að honum var sniðin. Þar fékk hann kurteislega og höfðinglega afgreiðslu, þótt undirrituðum sé ekki sú virðing sýnd á hans síðum.

Satt er það Jón, nafni þinn vill helst skrifast á við já menn sína og kóara, því þar hæfir kjaftur skel.

En takk fyrir innlitið Jón Daníelsson og þitt jákvæða og stórgóða innlegg.