Grillóðir Kanar

Það er engu líkara en Bandaríkjamönnum finnist þeir naktir og varnarlausir verði frá þeim tekin reglubundin grillun á saklausu jafnt sem seku fólki og þá helst svörtu.

Það má með sanni segja að réttlætisgyðjan bandaríska sé staurblind, því eftir að dauðadómur er á annað borð fallinn, er nánast ógerningur að hreyfa við honum. Allt réttarfarskerfið leggst á eitt að fullnægja slíkum dómum, jafnvel 20 árum síðar, þótt nýjar upplýsingar bendi sterklega til þess að dómurinn hafi ekki verið á fullkomnum rökum reistur.

Að flestra mati ætti minnsti vafi á sekt að vera nóg til að dauðadómi sé ekki fullnægt. En eins og Kaninn praktíserar þessi mál þarf ekkert minna en fullkomna sönnun á sakleysi til að bjarga mönnum frá grillinu.

Réttafarsleg morð á saklausu fólki er víst talinn ásættanlegur fórnarkostnaður í ofurkappi  bandaríkjamanna að útdeila réttlætinu sem best og víðast.

  

Áfrýjun Troy Davis hafnað

Athugasemdir

[Kolbrún Hilmars, 20.9.2011 kl. 17:30]

Axel, ég hélt að þú værir að vísa til loftslagsmengunar í fyrirsögninni því jafnvel hörðustu náttúruverndarsinnar vilja hafa sitt "back-yard-coal-barbecue" í friði á meðan þeir heimta bann á reykingar nágrannans.

Það er ekki hægt að gagnrýna bandarískt fyrirkomulag - slíkur er tvískinningurinn á öllum sviðum.

[Axel Jóhann Hallgrímsson, 20.9.2011 kl. 17:37]

Betur að svo hefði verið.

Menn eru eina dýrategundin sem er grilluð í heilum skrokkum óaðgerðir og sitjandi.

Satt segir þú um tvískinnunginn.

[Jens Guð, 20.9.2011 kl. 22:14]

  Sönnun á sakleysi dugir ekki alltaf til.  Skrifstofubáknið er stundum svo þungt í vöfum að það þarf heilmikinn kostnað og langan tíma til að koma saklausum úr snörunni.  Þetta er þó mjög mismunandi á milli ríkja BNA.  Inn i þetta þunglamalega dæmi sums staðar spilar að einkarekin fangelsi hafa fjárhagslegan ávinning af því að halda föngum sem lengst á bak við lás og slá.  

  Góðu fréttirnar eru þær að afbrotum fækkar í BNA þessa dagana.  Það hefur eitthvað að gera með baráttu mannréttindasamtaka.  Ég veit samt ekki alveg hvernig það dæmi er.  Í flestum vestrænum ríkjum eru 40 - 70 glæpamenn á hverja 100 þúsund íbúa.  Í BNA eru þeir 700.  En talan er að lækka svo litlu nemur.  

[Axel Jóhann Hallgrímsson, 20.9.2011 kl. 23:23]

Takk fyrir þitt innlegg Jens. Báknið sér um sig.