Hættum að áreita Kringluna

Afskaplega er það dapurt af rekstraraðilum Kringlunnar að rukka góðgerðar- og líknarfélög fyrir afnot af smá gólfplássi í þágu góðs málefnis.  Maður hefði haldið að óreyndu að eigendur Kringlunnar hefðu þá reisn og þann metnað að seilast ekki með krumlu græðginnar ofan í söfnunarbaukana hjálparsamtaka. Þeim ætti frekar að vera það kappsmál að leggja góðgerðarfélögum lið þó ekki væri með öðru en einum fermetra af gólffleti annað veifið.

Kringlan ber fyrir sig ónæði og áreiti sem viðskiptavinir verða fyrir sem ástæðu fyrir þessu hnupli úr söfnunarbaukunum. Lægra verður ekki lagst. Viðskiptavinir Kringlunnar sætta sig örugglega mun betur við áreitið núna, vitandi að Kringlan rukkar fyrir óþægindin.

Til að koma til móts við Kringluna ætla ég framvegis að hlífa þeim sem mest ég má við áreiti af minni hálfu og snúa mér annað með mín innkaup.

  

Leigja pláss í Kringlunni

Athugasemdir

[Ásthildur Cesil Þórðardóttir, 16.10.2012 kl. 22:40]

Einmitt það mun ég líka gera Axel.

[Axel Jóhann Hallgrímsson, 17.10.2012 kl. 11:09]

Þetta er afspyrnu lélegt Ásthildur og enn lélegra að bera fyrir sig nöldur úr einhverjum nöldurseggjum sem vísast nöldruðu líka, hyrfu þessi þjóðþrifa félagasamtök  annað.

[Ásthildur Cesil Þórðardóttir, 17.10.2012 kl. 12:46]

Já þeir eru til Jóakimar Endur þessa lands. Það er skömm að þessu og ég vona að forkólfarnir fái að heyra það frá fólki.  

[Anna Dóra Gunnarsdóttir, 17.10.2012 kl. 17:25]

Ég veit ekkert hvað rétt er að gera gagnvart sölufólki almennt. Fer kannski eftir málefninu, en að taka gjald af björgunarsveitamönnum finnst mér illa gert.