Siðlaus myndataka

Í fréttum sjónvarps í gær var frétt um slys á vélsleðamanni í Unadal og að þyrla gæslunnar hefði verið send að sækja manninn.  Með fréttinni birtist myndskeið af vettvangi sem sagt var að áhöfn  þyrlunnar hafi tekið.

Mér brá satt best að segja verulega þegar ég heyrði þetta. Er þetta það sem koma skal, að sjúkraflutningamenn, lögreglumenn og annað björgunarlið taki upp myndavélarnar sínar  á vettvangi slyss og taki þar myndir til að selja fjölmiðlum?

Það má vera að áhöfn þyrlunnar hafi engin lög brotið með myndatökunni, ég þekki það ekki, en siðlaust er þetta athæfi klárlega og tæplega í samræmi við ætlaðar starfsskyldur þyrluáhafnarinnar.

Fréttatími RUV – fréttin byrjar á 17:00

Athugasemdir

[Ingibjörg Axelma Axelsdóttir, 12.3.2013 kl. 18:33]

Ég skil bara einfaldlega ekki afhverju myndatökur hafa yfir höfuð verið leyfðar af slysstöðum, hvort sem það er af völdum vegfarenda eða fréttamanna.

[Axel Jóhann Hallgrímsson, 12.3.2013 kl. 19:28]

Það er sjónarmið út af fyrir sig. En það er siðlaust með öllu að þeir sem koma á slysstað til að þjónusta slasaða taki myndir og selji fjölmiðlum. Ef það verður viðtekin venja að þessir aðilar taki myndir á slysstað fyrir fjölmiðla skapast fljótt samkeppni um að ná bestu myndunum sem fyrst og það kann að lenda í forgangi fyrir þeim slösuðu.

Ég vona að yfirstjórn Landhelgisgæslunnar taki á þessu strax.