Aldrei aftur Katar

Það er greinilegt að eitthvað er bogið við dómgæsluna í leikjum Katar á mótinu. Um þverbak keyrði dómgæslan í leik þeirra gegn Pólverjum. Um það verður ekki deilt, slík var hrópleg og grímulaus hlutdrægni dómaranna.

Vonlaust er að um tilviljun sé að ræða. Spurningin er ekki hvort, heldur hvernig þrýstingi eða „tilliðkun“ hafi verið beitt á dómarana af hálfu Katar. Fróðlegt verður að sjá hvernig dómgæslunni verður háttað í úrslitaleiknum, þegar allt er undir!

Ef dómgæsla mótsins í heild sinni verður ekki að móti loknu vegin og metin af alþjóahandknattleikssambandinu er eitthvað mikið að á þeim bænum. Raunar hefur því verið haldið fram að valið á Katar, sem mótshaldara, sanni að svo sé, svo ekki sé talað um allt svínaríið fyrir mótið, hvaða lið væru með og hver ekki.

Þessa móts í Katar verður sennilega helst minnst í framtíðinni fyrir það að þar var, frá íþróttalegu sjónamiði, allt eins og það átti ekki að vera. Peningarnir hafa sennilega endanlega gengið af íþróttaandanum dauðum.

Svo hefur Katar líka keypt HM í fótbolta 2022. Ekki verður fjárausturinn í alla þætti mótsins minni í þeirri dellu allri en handboltanum nú. Katar á meiri peninga en sand og því verður máttur fjármagnsins nýttur til hins ýtrasta og íþróttin, sem slík, verður á endanum eina fórnarlambið.

Katar í sögubækurnar

Athugasemdir

[Ómar Bjarki Kristjánsson, 31.1.2015 kl. 12:02]

Það er rétt.  Þetta er ekki sérlega glæsilegt.  Og ef Katarmenn eða yfirvöld þar hafa hugsað þetta sem einhverja auglýsingu fyrir sig, - þá er sú auglýsing ekki endilega góð.

Það er soldið kjánalegt að horfa á þetta dæmi.  Það er bara allt keypt, - áhorfendur eru keytir líka!  

Og ef fólk hefur horft á mótið að einhverju ráði og fylgst með áhorfendum frá Katar, - engin kona!

Ha??  Engin kona.  Þær mega það sjálfsagt ekki.  

En með Katar liðið sem slíkt, að þá er það vissulega sterkt.  Það er gríðarlega líkamlega sterkt og þeir eru mjög vel samæfðir.  Enda verið saman og æft síðan síðasta sumar, að því er kunnugir segja.

Dómarinn hefur svo óumdeilanlega áhrif bæði í Þjóðverja- og Pólverjaleiknum.  Það sést miklu betur þegar skoðað er aftur.  

Stundum er ekki alltaf alveg augljóst hvernig dómarnir lögðust með Katar en það sést betur þegar rýnt er í á bandi hvað skeði.  

Blokkeringarnar eru svo svakalegar hjá Katar og dómarnir leyfa svo mikla hörku, - að leikirnir voru á köflum barasta bardagi.

Umræða um þetta hlýtur að halda áfram.   Þetta er ekki sneddý fyrirkomulag, að mínu mati.

Auðvitað er alltaf viðloðandi svokölluð heimadómgæsla, - en maður hefur sjaldan sé slíka einbeitni til að hjálpa öðru liðinu eins og í síðustu Katarleikjunum.

Svo koma líka alveg skýr atriði öðru hvoru í leikjunum.  Dæmdur ruðningur öðru megin en álíka atvik hinumegin víti og tvær mínútur.

[Ómar Bjarki Kristjánsson, 31.1.2015 kl. 15:16]

Ps.  það segir líka ákveðna sögu, að Katar er prúðasta liðið mótinu só far.  Hahaha.  Fengið minnst dæmt á sig ag vítum, aukaköstum, tveim mínútum oþh.

Prúðasta liðið.

Maður hefur sjaldan séð eins mikinn bardaga í varnar- og sóknarleik og hjá Katar.

Við erum að tala um að þeir vaða í andstæðinga, taka í þá og keyra bókstaflega ofan í gólfið!  Dómarinn segir bara ok.

Eins og eg minnist áður á með blokkeringarnar sem þeir setja upp, - þetta nálgast að vera hreint ofbeldi.  Þetta er bara glíma einstaklinga.

En þrátt fyrir þetta sem segir að ofan, þá er liðið skipað þokkalega sterkum einstaklingum handboltalega séð og sumum reyndum.  Markvörðurinn frábær o.s.frv.

En þetta lið er ekkert með þeim bestu.

Dómgæslan í 3 síðustu leikjum hefur verið þess eðlis, að eins og markvörður Þjóðverja sagði eftir leikinn:  Þetta var nú þannig leikur sem við áttum ekki að vinna.  Það var búið að ákveða annað.

Fleiri en markvörður þýskalands hljóta að hugsa álíka hugsun eftir að hafa séð þessi ósköp.

[Axel Jóhann Hallgrímsson, 31.1.2015 kl. 17:57]

Ef þetta verður ekki rannsakað af alþ.handkn.sambandinu Ómar Bjarki, þá er eitthvað mikið að. Þá er ljóst að "Kadar sandurinn" hefur náð upp á hæstu hæðir!

HM í fótbolta verður þarna 2022. Margir hugsa sér gott til glóðarinnar þarna í sandinum og eflaust þegar farnir að maka krókinn.