Gullið verður bónus.

 

Hvernig sem leikurinn á morgun fer, kemur íslenska handboltaliðið, „strákarnir okkar“ heim sem sigurvegarar, þjóðhetjur, ekkert minna.  Í höfn eru silfurverðlaun í handbolta á Ólympíuleikum, sem er ekkert smáræði í hópíþrótt fyrir litla þjóð eins og Ísland.  

Gullið yrði alger bónus, en við megum ekki láta vonbrigði og svekkelsi ná tökum á okkur þótt toppurinn náist ekki, við höfum nú þegar unnið sigur. Höfum sýnt og sannað hvers við erum megnug og að við getum þetta, höfum sýnt að þeir litlu eiga líka möguleika.

Þessi árangur verður um ókomna tíð skólabókardæmi um hvað er mögulegt þótt torsótt virðist.

Það er ekki nokkur vafi á því að vera Íslensku forsetahjónanna á  áhorfendabekkjunum og annar stuðningur þeirra hefur verið liðinu hvatning, svo ekki sé talað um andann að heiman, sem hefur verið sterkari en orð fá lýst.

Ég er sannfærður um að strákarnir klára þetta. Ég er að springa af stolti og þjóðernisrembingi og skammast mín hreint ekkert fyrir það.

Áfram Ísland.

Þjóðsöngurinn hér

„Ég vil fá gullið og þjóðsönginn“

Athugasemdir

[Gulli litli, 23.8.2008 kl. 17:13]

Mér leiðist handbolti og Þjóðsöngurinn er enn verri....

[Sigrún (IP-tala skráð) 23.8.2008 kl. 17:20]

Ég er þegar farin að fagna. Finnst þetta frábært hjá þeim. Mér líður bara eins og við höfum náð gullinu. Þetta er sigur fyrir mér. Eins og þú segir þá er gullið bara bónus.

Ekki sammála Gulla litla hér að ofan. Handboltinn er mjög skemmtilegur og Þjóðsöngurinn er fínn. Það geta allir sungið hann. Fólk er bara búið að láta segja sér að það sé ekki hægt og því trúir það því. Eins gott að handboltalandsliðið okkar hlustaði ekki á einhverjar svoleiðis neikvæðnisraddir sem sögðu "Þetta er ekki hægt."

[Kári S. Lárusson (IP-tala skráð) 23.8.2008 kl. 21:51]

Sæll Axel.

Þjóðsöngurinn er ömurlegur. Sama má segja um Ólaf Ragnar. Að mínu mati hefur vera hans á leikunum ekkert með árangur liðsins að gera. Hann er þarna eingöngu til að láta á sér bera eins og honum er tamt.

Hvorttveggja gleymist þó um stundarsakir, meðan leikir handboltalandsliðsins standa yfir.

Liðið er skipað frábærum íþróttamönnum og þjálfarinn og allir sem að þessu ævintýri koma, standa sig einstaklega vel. Hópurinn  er sannarlega sómi lands og þjóðar. 

Stertimenni í stúkunni breyta engu þar um.

Þetta er eindregið mín skoðun.

Áfram Ísland 

[Axel Jóhann Hallgrímsson, 24.8.2008 kl. 23:55]

Takk fyrir innlitin. 

Kári ég get verið sammála með þjóðsönginn, hann hentar ekki og honum þarf að skipta út. En berum virðingu fyrir honum meðan við höfum hann, ekki satt?

Liðið er frábært og sómi okkar, tek undir það.

En það er umhugsunaratriði að um leið og varaformaður Sjálfstæðisflokksins var sestur á áhorfandabekkinn þá datt botninn úr liðinu!

Kveðja,

[Kári S. Lárusson (IP-tala skráð) 25.8.2008 kl. 20:31]

Ég er ekki sammála því að botninn hafi dottið úr liðinu. Að tapa fyrir gríðarsterku liði Frakka með fimm marka mun, er engin skömm. Öll lið eiga sína góðu daga og líka daga þegar allt gengur ekki upp. Liðið átti einfaldlega ekki sinn bezta dag þegar úrslitaleikurinn fór fram og ég held að vera fyrirmanna í stúkunni hafi ekkert haft með það að gera.

Og ég ítreka að mér fannst botninn alls ekki dottinn úr liðinu.

Kveðja,

[Axel Jóhann Hallgrímsson, 26.8.2008 kl. 10:50]

Kári ég er alveg sammála þér. Tók of djúpt í árinni.