Fyrstu hvalirnir komnir á land, þetta er góður dagur.

 

Vonandi verða þeir margir svona, dagarnir á þessari vertíð og vertíðum komandi ára. Til hamingju Ísland.

 

Risavaxinn morgunverður

Er batnandi mönnum best að lifa?

Sú var tíð að þeim Bakkabræðrum þótti allt betra en Ísland til atvinnustarfsemi og fluttu fé, og allt þeim bræðrum, græðandi úr landi.

Nú hafa þeir bræður skyndilega fundið í fórum sínum áður gleymdar RISAtaugar til föðurlandsins og vilja því styðja við bakið á uppbyggingunni.

Hugmynd þeirra bræðra er með þessu að kaupa sér bætta ímynd fyrir aðeins hluta þess svikafjár sem þeir öfluðu með loftbólustarfsemi og öðrum óbermishætti og fluttu úr landi.

Bakkabræður, étið það sem úti frýs, það vill ykkur enginn hingað heim.  

 

Verksmiðja Bakkavarar gæti skapað 750 ný störf

Verslað út á krít með meiri krít.

Það er hæpið að aumingja konan hafi haft tíma og tækifæri að klæðast öllum þessum flíkum þó ekki væri nema einu sinni fyrir utan mátunarklefann.

Af þessu sést að víða er útrásareðlið. En útrás er með þeim ósköpum að vera innrás á annan. Eins gróði verður annars tap. Það er aðeins gott til skamms tíma að geta verslað út á krít. Einhver þarf að taka upp veskið fyrr eða síðar.

Sumir hafa fengið án fyrirhafnar og án sýnilegrar innistæðu, takmarkalitlar úttektarheimildir, nánast sjálftökur,  meðan öðrum minni spámönnum var gert að sanna sig og tryggja í bak og fyrir.

Þannig var það á Íslandi hinu góða, landi fjármála sóða.

Tugmilljónir í tískufatnað

Laus til leigu eða kaups.

Fjölmiðlafulltrúi Hilton fjölskyldunnar hefur látið þau boð út ganga að snótin Paris Hilton sé á laus til leigu eða kaups. Hún mun vera nýuppgerð og yfirfarin yst sem innst.

Áhugasamir vinsamlegast snúi sér til..... 

Þá mun fjölskylda hennar fagna því að tekist hafi að rifta samningi hennar og fyrri notanda. Því hann hafi aðeins verið að notfæra sér þessa hlédrægu og saklausu sveita snót til að vekja athygli á sjálfum sér.

Já..... það sem fólki dettur í hug. 

Paris laus á ný

Sjálftöku samráðsolíufélögin.

Stór orð voru viðhöfð af talsmönnum olíufélagana í garð þeirra sem gagn- rýndu og vefengdu lögmæti tafarlausrar hækkunar þeirra á bensíni og olíu strax í kjölfar lagasetningar um hækkun tolla á Alþingi.

Með lækkun nú hefur Skeljungur viðurkennt í verki að olíufélögin hafi nú rukkað hækkaða tolla án heimilda í eina 10 daga. Þessu fé þurfa þau að skila aftur til neytenda. Það hlýtur því að vera krafa neytenda að olíufélögin selji  bensínið á gamla verðinu í jafnmarga daga, eftir að tollahækkunin verður virk, og þeir hafa innheimt tollinn ranglega.

Sjái þau ekki sóma sinn í því, opinbera þau þann sannleik að þau eru ekkert annað en sjálftökulið og rumpulýður.

Olíufélögin eru aðeins innheimtu aðilar fyrir sköttum ríkisins. Það er ljóst að þessari tollahækkun sem olíufélögin hafa rukkað á tanknum verður ekki skilað til ríkisins, því tollurinn hefur ekki enn verið lagður á.

Það er í eðli sínu engin munur á að stinga þessu fé í vasann en að skila ekki Virðisaukaskatti. En það er, samkvæmt þeim viðurlögum sem við liggja, nánast glæpur glæpanna hérlendis.

Til marks um þá villtu samkeppni sem olíufélögin segja sín á milli, þá ákváðu þau merkilegt nokk, hvert í sínu lagi auðvitað og án vitundar um hvors annars gjörð, öll að fremja sama glæpinn á sama klukkutímanum.

Geri aðrir betur.

 

Skeljungur lækkar bensín

Við megum ekki spara, okkur til skaða.

 

Til allrar lukku varð ekki manntjón þegar hafn-  sögubátnum hvolfdi við björgun togarans Sóleyjar Sigurjóns af strandstað fyrr í dag.

Varðskipið Týr og Norska varðskipið Harstad náðu togaranum á flot. Óvíst er að það hefði tekist, hefði Harstad ekki notið við. 

Harstad er systurskip nýja varðskipsins Þórs, sem er í smíðum fyrir Landhelgisgæsluna í Chile. Aðkoma Harstad að strandinu sýnir hversu brýn þörfin er orðin á svo öflugu nýju skipi.   

Fiskiskip okkar eru orðin það stór sum hver að varðskipin okkar, ráða hreinlega ekki við svona verkefni. Svo ekki sé talað um stærri skip sem leið eiga um lögsögu okkar.

Það var lán í óláni að strandið varð þegar best var og blíðast. Oftar en ekki eru þær aðstæður að óveður er í aðsigi og aðeins nokkurra klukkutíma svigrúm til aðgerða.

Ef ekki hefði tekist að ná togaranum á flot og strandið fengið á sig storm hefði togarinn sennilega ónýst og þetta smá óhapp orðið að stórtjóni. Ef ekki er til í landinu öflugt björgunarskip, getur það orðið dýrt og of seint ef bíða þarf eftir skipi að utan til bjargar.

Því eru þær hugmyndir, sem heyrst hafa, að nýi  Þór komi ekki hingað heldur verði leigður Norsku strandgæslunni, í sparnaðar skyni, ekki aðeins stórundarlegar heldur beinlínis hættulegar.

Hætt komnir þegar lóðsinn sökk

Blæðir bílaumboðunum út?

Það var ekki bara að bílaumboðin gerðu þessa rekstrarleigusamninga óþvinguð og af fúsum og frjálsum vilja, heldur stunduðu þau þetta viðskiptaform af miklu kappi.

Ómældu fé var varið í auglýsingar og ýmsar  fegrunaraðgerðir á þessu viðskiptaformi , í því markmiði að hremma  viðskiptavini. Hrunadansinn var glatt stiginn kringum Gullkálfinn.

Viðskiptavinir bílaumboðana, sem hafa lent í vandræðum með greiðslur á gylliboðum þeirra hafa ekki fengið neina meðaumkun þaðan eða sjúkrameðferð aðra þótt þeim hafi blætt.

Bílaumboðin verða að taka afleiðingum gerðra samninga rétt eins og aðrir og blæða út ef ekki vill betur. Gerningurinn var alfarið þeirra.

Umboðin sitja uppi með hundruð rekstrarleigubíla

Snöggir upp, seinir niður.

Að venju fylgjast olíufélögin vel með sé veiking krónunnar yfirvofandi til að geta bæði fljótt og skilmerkilega skilað þeim hækkunum til neytenda.

Hjá N1 vonast menn til að olíuverð lækki á upp úr miðju ári. Og þá munu olíufélögin að sjálfsögðu lækka verðið aftur, en að venju seint og illa. 

  

Lækkun á gengi krónunnar hækkar bensínverðið

Er Páfinn viðskiptavinur Símans?

Síminn viðhefur, vægt til orða tekið, vafasama viðskiptahætti. Hann áskilur sér rétt til að breyta einhliða, draga úr og takmarka umsaminn gagnaflutning til viðskiptavina þegar það hentar honum.  Hinsvegar hentar það ekki Símanum að lækka verðið í samræmi við skerta þjónustu.

Páfinn hlýtur að vera viðskiptavinur Símans. Það er eina skýringin á því hvers vegna Páfinn greip til þess ráðs að skilja eftir skilaboð til Guðs á bréfmiða í Grátmúrnum. Hann hefur talið það fljótlegra en að nota ADSL tengingu Símans.

Það er hart ef síminn þrengir svo að viðskiptavinum sínum að þeir sjái hag sínum best borgið með notkun á flöskupósti.

Páfi við Grátmúrinn

Borgar þetta sig?

Það væri fróðlegt að vita hvort sektir vegna misnotkunar lituðu olíunnar standi undir kostnaðinum við allt eftirlitsbatteríið? 

Er virkilega ekki til einfaldari leið en að vera með dísellöggu sem stoppar bíla og kíkir ofaní olíutankana?

Þetta hljómar svolítið Sovéskt.

.

Einn með litaða olíu á bílnum