Glæpnum stolið

Trúlega er Páll Magnússon  hæfastur umsækjenda um starfið og ráðning hans því fullkomlega eðlileg.  

En ég sé fyrir mér öll spillingar- og vandlætingarbloggin sem hefðu haugast upp undir þessari frétt ef hæfasti umsækjandinn hefði slysast til að vera Samfylkingarmaður eða Vinstri grænn en ekki Framsóknarmaður að langfeðratali.

   

Páll ráðinn forstjóri Bankasýslu

Hverju reiddust goðin?

Lögreglan hefur gefið það út að hún muni ekki standa heiðursvörð við setningu Alþingis. Það er  staðreynd.

Lögreglustjórinn  ber fyrir sig sparnaði, en það gildir einu hver ástæðan er, heiðursvörður lög- reglunnar verður ekki við þing- setninguna, það er útgangspunkturinn.

Ég fæ því ekki séð af hverju Ólína ætti að biðja lögregluna afsökunar á þeirri hugmynd sinni að björgunarsveitarmenn standi heiðursvörðinn í þeirra stað, þó mér finnist þessi hugmynd Ólínu afleit, sem slík. 

  

Undrandi á ályktun lögreglumanna

Vinir litla mannsins

Það er aðdáunarvert hvað Morgunblaðið og Sjálfstæðisflokkurinn láta kjarabaráttu, réttindi og velferð almennra launþega sig miklu varða þessar vikurnar. 

Það verður ekki amalegt að lifa komist þeir til valda, ef ekki verður þá snögglega áberandi  dýpra á allri ástúðinni og umhyggjunni.

Lögreglumenn á fundi

Útvarp Saga hvetur til stjórnarskrárbrots

Á Útvarpi Sögu er daglega skoðanakönnun og ekki þarf að fara í grafgötur með að í spurningunum stöðvarinnar felast, undantekningarlítið,  pólitískur boðskapur og þannig framsettur að ekki fer á milli mála að fiskað er eftir ákveðinni fyrirframgefinni niðurstöðu.

Á útvarpsstöðinni starfar stjórnlagaþingmaðurinn Pétur Gunnlaugsson og hefur stjórnarskráin og frumvarp til nýrrar stjórnarskrár fengið fyrir vikið meiri og jákvæðari umfjöllun en almennt gerist um á þessari stöð um málefni og menn. 

Nú bregður svo við að útvarpsstöðin hvetur til stjórnarskrárbrots með spurningu dagsins í dag: „Á forsetinn að sniðganga þingsetningu Alþingis 1. október“?  

Samkvæmt 22.gr. stjórnarskrár verður Alþingi ekki sett nema með aðkomu forsetans. Ekki fer á milli mála að í spurningu útvarpsins liggur ákveðin hvatning og von að forsetinn brjóti starfsskyldur sínar og stjórnarskrá og mæti ekki til setningar Alþingis.

Að auki hvetur útvarpsstöðin til þess að fólk fjölmenni á Austurvöll á laugardaginn og láti hendur skipta við setningu þingsins, þó ekki sé það sagt með beinum hætti. 

Fari fólk að ráðum útvarps Sögu með ófyrirséðum afleiðingum er næsta víst að stöðin mun afneita ábyrgð sinni tvisvar áður en haninn galar þrisvar.

  

Ólíkt hafast þeir að Sigmundur Davíð og Bjarni stefnulausi, formaður Foringjalausaflokksins

Sigmundur Davíð og Framsóknarmenn virðast ætla að standa í lappirnar í málefnum Palestínu. Gott hjá þeim.

En það sama verður ekki sagt um Bjarna stefnulausa, formann Foringjalausaflokksins. Þeirra afstaða kemur ekki á óvart, allt annað úr þeirri áttinni hefði verið hreint undur. Þeirra skoðun á málinu er aðsend, enda hefur flokkurinn sá aldrei rekið sjálfstæða utanríkisstefnu.

Sjálfstæðismenn gagnrýndu alla tíð Kommúnistaflokkinn og arftaka hans   Sameiningarflokk alþýðu - Sósíallistaflokkinn og síðar Alþýðubandalagið um að vera stýrt frá Moskvu. Þær ásakanir voru án vafa réttar hvað tvo fyrrtöldu flokkana varðar. En á sama tíma var Sjálfstæðisflokkurinn beintengdur við Hvíta húsið og tók við fyrirmælum þaðan og gerir enn.

Sjálfstæðismenn hafa alla tíð vart vatni getað haldið af þörf og þrá til þjónkunar við Bandaríkin. Steingrímur heitinn Hermannsson segir í ævisögu sinni að vitað hafi verið að „ákveðnir“ menn  bæru upplýsingar um menn og málefni í sendiráð Bandaríkjanna. Það fólk hefði örugglega talið samskonar slefburð í  Sovéska sendiráðið ekki vera sérlega þjóðhollan. 

Steingrímur segir ennfremur frá utanríkisráðherratíð sinni í ríkisstjórn Sjálfstæðisflokks, Framsóknarflokks og Alþýðuflokksins. Sjálfstæðismenn voru dæmalaust viðkvæmir og uppstökkir yfir nánast öllum embættisfærslum Steingríms og höfðu allt á hornum sér.

Ástæðan fyrir ergelsi þeirra var sú að Steingrímur taldi eðlilegt að Ísland, sem sjálfstætt ríki, hefði sjálfstæða utanríkisstefnu og sleppti því takinu á pilsfali Bandaríkjanna. Sérlega argir urðu Sjallarnir, yfir stefnubreytingu Steingríms á afstöðu Íslands til deilunnar fyrir botni Miðjarðarhafs, svo mjög að stjórnarslitum var hótað.

En það er bara broslegt að Bjarni stefnulausi, formaður Foringjalausa flokksins skuli reyna að halda því fram að hann hafi myndað sér sjálfstæða skoðun á málinu. 

Gott....

....mál!

Lýsti yfir stuðningi við Palestínu

Allgóð samstaða!

„Allgóð samstaða“  er í utanríkismálanefnd, um stuðning við umsókn Palestínu um aðild að Sameinuðu þjóðunum. Hvað það merkir nákvæmlega kemur ekki fram í fréttinni.

En ef að líkum lætur þá merkir „allgóð samstaða“ sennilegast fulla samstöðu nefndarinnar um málið að frátöldum tveimur fulltrúum Sjálfstæðisflokksins, formanni flokksins og varaformanni hans.

Þau hjúin hafa, án minnsta vafa, gjörólíka sýn á málið en aðrir nefndarmenn. Þau, sem sannir Sjálfstæðismenn, víkja ekki gráðu frá þeirri stefnu sem Síonistar ákveða fyrir Bandaríkjastjórn og það sem Bandaríkjamenn vilja, vilja þau.

Sjálfstæðismenn hafa, þrátt fyrir nafnið, aldrei haft sjálfstæða utanríkisstefnu. Í þeim málum er Sámur frændi einráður.  

En það er ekki nóg að Ísland sé sammála umsókn Palestínu og ætli að greiða henni atkvæði á vettvangi SÞ. Við Íslendingar eigum  að beita okkur hart í málinu og  láta í okkur heyra. Við eigum að standa í lappirnar, vera menn en ekki mýs.

  

Samstaða í utanríkismálanefnd um Palestínu

Rís þú unga Rússlands merki

Þessi embættis velta er einkar hagkvæmt fyrirkomulag hjá þeim Pútín og Medvedev , bráðsnjöll hugmynd og til fyrirmyndar

Þeir eru báðir einlægir lýðræðissinnar, og mega því ekki til þess hugsa að brjóta stjórnarskrá Rússlands. Því ætla þeir að skiptast á um að gegna embættum forseta og forsætisráðherra , svo lengi sem báðir lifa.

Til að fylla formið verða að sjálfsögðu reglulega haldnar viðeigandi „kosningar“ með for- prentuðum atkvæðum að sjálfsögðu til að flækja málin ekki um of.

Þannig og aðeins þannig verður hægt að tryggja framgang lýðræðisins í hinu unga Rússlandi, um ókomna tíð.  

Stalín og Brezhnev hvað?

Fögnuðu framboði Pútíns

Össur, hvort ert þú maður eða hænsn?

Össur koma svo, sjá og sigra og viðurkenna sjálfstætt ríki Palestínu. Jón Baldvin Hannibalsson stóð í lappirnar þegar hann fyrir hönd Íslands viðurkenndi fyrstur sjálfstæði Eystrasaltsríkjanna.

Össur nú er lag að sýna að þú eigir eitthvert erindi í fótspor Jóns Baldvins og að sért kjarkmenni en ekki hænsn.

Mikið í húfi fyrir Palestínu

Ríkið lokað næstu daga - Mulningur #69

Áfengi skammtað

Áfengisútsölu ríkisins var lokað í gær og verður hún lokuð nokkra daga. Ástæðan er sú, að ríkisstjórnin hefur ákveðið að taka upp skömmtun áfengis. Áfengisskömmtuninni verður hagað þannig , að allir, karlar sem konur, er náð hafa 21 árs aldri, geta fengið skömmtunarbók hjá lögreglustjóra, hver í sínu héraði.

Áfengisskammtur karlmanna á mánuði hverjum verður tvær flöskur af sterkum drykkjum eða fjórar flöskur léttra vína. Skammtur kvenna er helmingi minni.

Skömmtun þessi átti að hefjast í dag en prentun skömmtunarbókanna („áfengisbókanna“) er ekki lokið. Áfengisútsalan verður því lokuð þar til bækur þessar koma á „markaðinn“.

                                                                                       Frétt 1.10.1940. Heimild; Öldin okkar.

 

Athygli vekur að þáverandi ríkisstjórnin (Þjóðstjórnin A+B+D) telur ástæðu til, af gefnu tilefni væntanlega, að draga meira úr áfengisneyslu kvenna en karla. Ekki fylgir sögunni hvort þetta ráðslag skilaði þeim árangri sem til var ætlast og dregið úr eftirspurn áfengis. Eða hvort þeir sem hafi að staðaldri notað áfengi í hófi eða alls ekki, hafi séð sér leik á borði og nýtt sér þorsta annarra og keypt sinn „skammt“ og selt á svörtu. Svo ekki sé talað um þá vítamínsprautu sem þetta hefur verið fyrir blessað smyglið.   

Skömmtunar- og haftastefnur hverskonar hafa aldrei áorkað öðru en efla brask og svartamarkaðsviðskipti og færa viðskiptin úr skattskyldu umhverfi niður í undirgöng skattsvika. Þrátt fyrir áratuga afleita reynslu af þannig efnahagsráðstöfunum eru sumir stjórnmálamenn enn þann dag í dag fastir í gömlum hjólförum hafta og úrræðaleysis.