Virðingarverðir morðingjar??

Hún er afskaplega þreytandi  síendurtekin nauðgun Íslenskra fjölmiðla á virðingarávarpinu HERRA!

Hvað ofan í annað eru forhertir ofstopaglæpamenn og hryðjuverkamenn  sem ganga um eyðandi hendi, nauðgandi og myrðandi, kallaðir í íslenskum fjölmiðlum „stríðsherrar“.

Mér er fyrirmunað að sjá nokkuð herralegt og því síður virðingarvert við þessi úrhrök mannkyns.

Fjölmiðlar, kallið sorpið sínu rétta nafni.

Var að hefna fyrir morðið á Mehsud

Aðdáunarverð þrautseigja.

Að leggja árar í bát, þótt á móti blási er hugtak sem greinilega er ekki  til í orðasafni þessarar þrautseigu konu, sem hefur náð skriflega hluta ökuprófsins eftir 950 tilraunir.

Vonandi verður verklegi hluti ökuprófsins ekki jafn brattur fyrir þessa stórmerkilegu konu, svo hún geti sem fyrst látið þann draum rætast að fá sér bíl.

Náði skriflega prófinu í 950. tilraun

Að stóla á mbl.is

Á mbl.is hefur greinilega verið lögð af gamla aðferðin að setjast á stóla og standa upp af þeim.

Tekin hefur verið upp sú nýbreytni að stíga  á og  af stólum.

Davíð hefur þá stigið á ritstjórastól Moggans. Vonandi fatast honum ekki staðan þótt staða blaðsins sé afleit.

.

 

Fegurðardrottning stígur af stóli

Tundurdufl eða tundurskeyti?

Í fréttum af þessu flaki, sem nú hefur verið staðfest að sé af tundurspillinum Alexander Hamilton, hefur því hvað eftir annað verið haldið fram að skipinu hafi verið sökkt með tundurdufli, sem er alrangt.

.

.

.

Það er vitað að Þýski kafbáturinn U132 sökkti Alexander Hamilton. Kafbátar nota  tundurskeyti ekki tundurdufl.

Tundurdufl er eins og nafnið bendir til dufl með sprengihleðslu sem lagt er við festar til að loka af eða torvelda siglingar skipa um ákveðin svæði.

Tundurskeyti er eins og nafnið bendir til skeyti með sprengiefni sem skotið er á skotmarkið, þau voru drifin,  ýmist með þrýstilofti eða rafmagni.

Það er merkilegt hve oft blaðamenn rugla þessu tvennu saman. Þeir hafa jafnvel kallað djúpsprengjur,  tundurdufl.  Djúpsprengjur voru notaðar gegn kafbátum.

.

Lekinn var frá Hamilton

Dauðans ákvörðun

Samdráttur á auglýsingamarkaði er sögð ástæða innreiðar Skjásins á áskrifendamarkaðinn.

En hvað gerist við upptöku áskriftar? 

Áhorf mun ekki aðeins minnka það mun hrapa, fólk er almennt ekki tilbúið að borga 2.200 kr. á mánuði fyrir dagskrá sem byggir að stórum hluta á endursýningum á endursýningar ofan.

Hvað gerist þegar áhorf minnkar? Þá kippa auglýsendur að sér höndum eða krefjast lægri taxta.

Líklegt er að þessi nýbreytni feli því aðeins í sér dauðann fyrir stöðina.

SkjárEinn verður áskriftarstöð

Hraðar hendur og fljótir fætur í dómskerfinu.

Stundum getur slappur málskilningur blaðamanna á móðurmálinu orðið býsna kómískur. Eftirfarandi málsgrein er upphaf fréttar á Vísi.is.

„Karlmaður var dæmdur í átján mánaða fangelsi fyrir nauðgun í Héraðsdómi Reykjavíkur í dag. Maðurinn nýtti sér ölvun og svefndrunga konu og hafði við hana samræði þegar hún var áfengisdauð“.

Af þessu verður ekki annað ráðið en að í dag hafi konu, í áfengisdái, verið nauðgað í Héraðsdómi Reykjavíkur og gerandinn hafi nú þegar hlotið dóm fyrir verknaðinn.

 

Málið er einfalt.

Ef Fréttablaðið ætlar að gefa skít í landsbyggðina með þessum hætti liggur beinast við að landsbyggðin svari í sömu mynt og gefi skít í Fréttablaðið. 

Víst má þá telja að auglýsendur krefjist lækkunar á verði auglýsinga vegna minna upplags og dreifingar. 

Hvert verður næsta skref blaðsins, frítt á Laugarveginum en selt á Hverfisgötunni?

Fréttablaðið selt úti á landi

Hefðu þessi lög bjargað Íslandi?

Það má velta því fyrir sér hvort það sé ekki ólán að þessi athyglisverðu lög séu ekki í gildi hér á landi.

Þá væri allur Íslenski karlpeningurinn á Hrauninu og útrásarhelförin hefði aldrei átt sér stað.

Fimm ár í fangelsi fyrir að stæra sig af kynlífsreynslu

Mikið hlýtur öllum að vera létt.

Það er búið að hanga eins og mara yfir heimsbyggðinni að Madonna kynni að ana út í einhverja vitleysu. En nú hefur þeirri angist verið eytt.

Madonna vill frekar lenda undir lest, en manni.

Má vera að hún fylli í tómið og fái sér páfagauk eins og Britney Spears gerði í vikunni. 

Madonna ætlar aldrei að giftast aftur

Mogginn í uppsveiflu?

Óskar Magnússon sagði  í Kastljósinu áðan að starfsmenn Moggans hefðu haft áhyggjur af því að hann, myndi með aðkomu sinni að blaðinu, reyna að hafa áhrif á ritstjórn þess.  Það hefði ekki gerst!! 

Ha...!!  HALLÓ!  Er uppsögn ritstjóra vegna ritstjórnarstefnu hans ekki afskipti af ritstjórn blaðsins? Geta afskiptin orðið öllu meiri?

Morgunblaðið hefur alla tíð notið mikils trausts landsmanna,  að sögn Óskars, og það traust var að aukast!! 

Og þá er ritstjórinn rekinn ásamt lunganu af reyndustu og hæfustu blaðamönnum blaðsins!  Já, einmitt!

Og til að bíta höfuðið af skömminni er einn umdeildasti maður samtímans og um leið einn helsti gerandinn í þeim málum, sem hvað mest hafa verið og munu verða í fréttum næstu misserin, Davíð Oddson, ráðinn til að ritstýra fréttum um hrunið og órjúfanleg tengsl hans við það beint og óbeint!

Ef þessi gjörningur verður til þess að auka traust á Morgunblaðinu, þá á þessi þjóð það skilið sem yfir hana hefur dunið.

 

Harmar uppsagnir