Lítil hreyfing á Hreyfingunni

Því miður, en að vonum, er lítil hreyfing á fylgi Hreyfingarinnar nema til hins verra, ef eitthvað er. 

Hvernig ætli standi á því að kjósendur eru gersamlega áhugalausir um þessa fyrrum vonarstjörnu Íslenskra stjórnmála?

Gæti verið að það hefði eitthvað með grímulausa hentistefnu og lýðsskrums pólitík þingmanna Hreyfingarinnar að gera?

  

Framsókn eykur fylgið

Í mörgu að sýsla hjá sýsla

Sýslumaðurinn á Selfossi liggur undir ámæli fyrir embættisfærslur sínar og ekki í fyrsta skipti. Sýslumaðurinn sá bindur ekki bagga sína sömu hnútum og aðrir. Hann er eins og kötturinn, sem fer sínar eigin leiðir.

Ekki benda á mig, segir sýslumaðurinn, spyrjið þá sem voru á vakt.

Sýsli er sannur embættismaður þegar að embættislegri ábyrgð hans kemur, hann veit nákvæmlega hvar á að draga línuna, rétt fyrir aftan görnina á honum sjálfum.  

Ábyrgðinni á sýslukontórnum er bróðurlega skipt á milli sýsla og undirmanna hans. Sýsli hefur falið undirmönnum sínum að bera alla ábyrgð á embættisfærslum sínum en sjálfur tók hann að sér það ok að þiggja launin fyrir þann þátt.

  

Rannsóknin flókin og erfið

Loksins, loksins.

Þá eru þær loks hafnar aðildarviðræðurnar við Evrópusambandið. Því ættu aðildarandstæðingar að fagna, ekki síður en aðildarsinnar. Allir ættu að vona að viðræðurnar gangi fljótt og vel fyrir sig.

Því fyrr sem viðræðunum lýkur, því fyrr kemur í ljós hvort innistæða sé fyrir áróðri beggja fylkinga, sem hefur á köflum verið bæði óvægin og rætin og stjórnast meira af tilfinningum en rökum.

Því fyrr sem viðræðunum lýkur, því fyrr geta Jón og Gunna á götunni tekið afstöðu, með eða á móti aðild, í þjóðaratkvæðagreiðslu.

Ef aðeins brot af öllu því sem andstæðingar ESB hafa látið frá sér fara um Evrópusambandið, og þann hrylling sem þeir segja það standa fyrir, er rétt,  verður aðild að því aldrei samþykkt.

Það er því óskiljanlegt að þeir skuli hafa barist með oddi og egg gegn aðildarviðræðum, sem munu óhjákvæmilega leiða sannleikann í ljós. Trúa andstæðingar ESB ekki eigin málflutningi betur en svo?

Til að fyrirbyggja misskilning, þá er ég ekki aðildarsinni, en ég vil sjá niðurstöðu viðræðnanna til að ég geti tekið ábyrga afstöðu.

  

Aðildarviðræður hafnar

Verður jólunum frestað?

Yfirlýsing Katrínar Júlíusdóttur um hugsanlega lagasetningu ofan í miðja flugmannsdeiluna var í besta falli óheppileg og vanhugsuð. Ég fæ ekki séð hvernig ætti að vera hægt að setja lög, sem skipa mönnum til vinnu á frídögum og öðrum umsömdum frítíma.

Vonandi lætur hin tæra vinstristjórn ekki hafa sig út í þannig þvælu. Nema auðvitað að hún ætli að fara  í smiðju félaga Castro, sem frestaði jólunum, sællar minningar, til að bjarga sykuruppskerunni. Þá yrði öllum frídögum á Íslandi væntanlega frestað til vors eða lengur til að bjarga túrismanum.

Þá væri ráð að ríkisstjórnin byrjaði á því að kalla þingmenn úr sínu digra sumarfríi og skipa þeim til vinnu. Ekki víst að það verði par vinsælt.

„Hurðinni skellt á okkur“

Það breytir öllu að hafa próf í truntuskap og óþverrahætti

Engin takmörk virðast fyrir því hversu langt sumir eru tilbúnir ganga í truntuskap og óþverrahætti. Þar ber frú Arnþrúður Karlsdóttir útvarpsstjóri á útvarpi Kjaftasögu höfuð og herðar yfir aðra óþverra þessa lands.

Frú Arnþrúður bunaði út úr sér þvílíkum reiðilestri í útsendingu í morgun út af grein í DV um læknadópið, þar sem fjallað var um andlát manns eftir inntöku læknadóps. Þar tók Arnþrúður upp þráðinn frá því hún gerði í buxurnar af hneykslan yfir frábærri umfjöllun Kastljóss um sama efni.  Frú Arnþrúður virðist hafa einhverra annarlegra hagsmuna að gæta í því máli öllu. Af hverju upplýsir útvarpsstjórinn ekki um þá hagsmuni? Þá kröfu gerir hún á aðra.

Málflutningur Frú Arnþrúðar gekk eingöngu út á að gera lítið úr blaðamanninum. Kallaði skrif hennar  krakkavitleysu og heimsku og að hún hefði ekki nægan lífsþroska og menntun til að skrifa um svona mál. Læknirinn væri með glæstan feril og  nýbúinn að fá Fálkaorðuna.

Eins og það sé einhver syndaaflausn. Fékk ekki  Georg nokkur,  skólastjóri  Kaþólska skólans og staðgengill biskups,  sem verið hefur í fréttum undanfarna daga, þá sömu orðu úr hendi Vigdísar? Opinberlega var hans ferill flekklaus, þar til nú.

Arnþrúður telur sig mega segja að fólk sé óþjóðalýður og dót og lygapakk, til þess er hún menntuð , að eigin sögn.  Það breytir auðvitað öllu!

Svo tók frú Arnþrúður móður fíkilsins fyrir. Kallaði sögu hennar tóma þvælu, bölvað kjaftæði og lygi. Móðirin ætti, sagði frú Arnþrúður, að athuga hvernig stóð að því að 13 ára sonur hennar varð fíkill! Móðirin ætti að skoða hvað væri að heima hjá sér!

Hvað gerði móðirin til að bjarga syninum? Spurði frú Arnþrúður.  Af hverju fór hún ekki með syninum (31 árs) til læknisins og hélt utanum lyfjaneyslu hans?!  

Svo skoraði frúin á Sögu á fólk, sem þekki til þessa máls, að hringja inn og segja hlustendum hvernig þessi kona hefði alið drenginn upp og gert hann að fíkli!!  

Halló! Halló!

Er nema von að þessi útvarpsstjóri hafi óskapast yfir því atriði í fjölmiðlalögunum að eigendur fjölmiðla væru ábyrgir fyrir því efni sem fjölmiðlarnir birtu!

Nú kemur DV í framhaldinu með einhverja lygasögu um mig, segir frú Arnþrúður, því þeir þola ekki að ég fletti ofan af vitleysunni og bullinu í þeim!

Ég hlýt að spyrja, hvað er að heima hjá frú Arnþrúði, hvernig uppeldi fékk hún, sem leiddi til umtalaðs lífernis hennar og þessa truntuskapar?

Af hverju segir hún ekki frá því, hæg ættu heimatökin að vera.  Hvað hefur veröldin gert henni, af hverju þessi heift og hatur?  Ber móðir hennar ábyrgð á því?

Spákonuhofið á Skagaströnd

Arnþrúður Karlsdóttir, á útvarpi Sögu,  hefur síðustu tvo morgna farið hamförum út af styrkjum sem Alþingi hefur veitt til Spákonuhofs á Skagaströnd.

Þetta er dæmigerð sleggjudómaumfjöllun Útvarps Sögu. Fullyrðingum skellt fram án þess að hafa fyrir því að rannsaka málið, hafa samband við hlutaðeigandi til að sannreyna söguna eða til að fá fleiri fleti og önnur sjónarmið á málið.

Frú Arnþrúður hefur látið í það skína að styrkirnir til Skagasrandar hafi verið til einnar tiltekinnar spákonu, en því fer fjarri, því nokkur störf eru tengd þessu verkefni, atvinnustarfsemi sem teldist heldur betur gild á höfuðborgarmælikvarða, væri höfðatalan tekinn inn í myndina.

Frú Arnþrúður lætur alveg hjá líða að greina frá nokkru er varðar, Þórdísi spákonu, landnámskonu á Skagaströnd, fóstru Þorvaldar víðförla. Saga Þórdísar er grunnurinn að þessari starfsemi, sem er umfram allt söguleg kynning og frásögn,  þó inn í það sé fléttað dulúð og öðru þessháttar.

Svo blandar frú Arnþrúður smá dassi  af pólitík  í samsæriskenninguna, gefur svo hitt og þetta til kynna til að krydda og styrkja blönduna.  Og sértrúarhópurinn,  sem myndast hefur utan um þessa  útvarpsstöð, sem útvarpar fátt öðru en neikvæðni andskotans, tekur andköf og hrópar hólí maaama!

En svo mikið veit ég um aðstandendur þessarar starfsemi á Skagaströnd, að styrkirnir, sem veittir hafa verið þessari starfsemi, í tíð núverandi ríkisstjórnar, hafa ekki verið út á pólitík, nema síður sé.

Ég óska Spákonuhofi á Skagaströnd og sjálfstæðiskonunum sem þar ráða ríkjum velfarnaðar, svo og annarri sprotastarfsemi á landsbyggðinni, sem á undir högg að sækja, ekki hvað síst vegna fordóma og sleggjudóma þéttbýlisins fyrir sunnan sem heldur að það geti lifað af án landsbyggðarinnar. 

Mogginn skúbbar

Eru þeir að frétta það fyrst núna á Mogganum að Hanna Birna njóti ekki fylgis nema tæplega helmings Sjálfstæðismanna?  

 Það er löngu úrelt frétt.

Þetta var á síðum allra blaða á Úranusi í janúar fyrir ári.

  

Hanna Birna nýtur mest trausts

Lítið gleður vesæla

Ef við ímyndum okkur að fylgi Hönnu Birnu, samkvæmt þessari frétt, sé hraðinn á farartækinu hennar á leið í vinnuna að efna kosningaloforðin þá er ljóst að fyrir hverja 50 og hálfan metra í rétta átt fer hún 49 og hálfan metra til baka. 

Það er því ljóst, ef fylgið er faratæki Hönnu Birnu, þá má hún ekki búa fjarri ráðhúsinu eigi henni að duga restin af kjörtímabilinu til að ná í vinnuna síðasta daginn.

 

Ánægð með þetta? Já Hanna Birna er gífurlega ánægð.

„Ánægjuleg staðfesting“

Ætlar að ryðja sjálfum sér úr vegi, en standa föst fyrir

Erfitt verður að toppa þetta útspil Guðfríðar Lilju. Aldrei fyrr hefur Alþingismaður óskað eftir nýju framboði til Alþingis gegn sér og sínum flokki því hann og flokkurinn hans væru svo lélegir að þeir væru ekki á vetur setjandi.

Guðfríður gæti leyst þetta vandamál strax hvað hana varðar og látið sig hverfa af þingi og unnið að því  innanflokks að VG leggi sig niður. Nei það gerir hún ekki, heldur býður sig fram gegn hinu nýja andspillingarframboði, sem hún kallar eftir, annað væri í hrópandi andstöðu við þann þversagnar anarkisma sem hún og þröngur hópur innan VG hafa aðhyllst og ástundað.

Guðfríður, Lilja Mó, Ásmundur og Atli höfðu alveg frá upphafi stjórnarsamstarfsins nöldrað og tuðað yfir  meintum skorti á stefnumálum VG í stjórnar- sáttmálanum og gert að stigmagnandi ásteytingarsteini.  

En sannleikurinn er sá að einu hefði gilt þótt stefna ríkisstjórnarinnar hefði verið ómenguð stefnuskrá  VG frá a til ö, þetta lið hefði samt fylgt anarkista og sjálfseyðingar eðli sínu og af ásetningi efnt til ágreinings, einungis ágreiningsins vegna.  

Vill Besta á þing

Jón Sigurðsson myndi sækja um aðild að ESB

Menn þurfa greinilega ekki að vera tvöfaldir frændur Jóns Sigurðssonar og tengdir honum um öll líkamsop eins og Jón Valur Jensson til að vita hvernig Jón hefði ráðið krossgátur dagsins.

Stjórnmálamenn eiga það til á hátíðarstundum rembast við að upphefja sjálfa sig með orðskrúði um Jón Sigurðsson og fara þá gjarna yfir það í smáatriðum  hvað Jón Sigurðsson héldi um þetta aða hitt.

Hvernig í andskotanum dirfast menn á 21. öld að gera 19. aldar manni upp orð og skoðanir á nútíma málefnum?  Engin rök eru fyrir þess háttar bulli.

Ég held að Jón Sigurðsson gæti, væri hann uppi núna,  allt eins verið harður stuðningsmaður aðildar að ESB, um það getum við auðvitað aldrei fullyrt, ......eða mótmælt.

En óneitanlega væri það fyndið.

Gleðilega þjóðhátíð!

Hugsjónir Jóns að leiðarljósi