Jákvæð og falleg saga

Afskaplega hugljúf, falleg og ævintýraleg saga,  sem endar sannarlega eins og góðra ævintýra er siður.

Týndi bróðirinn bjó í næsta húsi

Farinn í bloggfrí

Kæru bloggvinir og aðrir lesendur.

Nú þegar Bush er horfinn úr  Hvítahúsinu, nokkuð sem heimsbyggðin hefur beðið eftir í 8 ár, verður þvílíkt spennufall að ég hef ákveðið að taka mér frí frá bloggi um óákveðin tíma.

Ég mun snúa aftur.

Mannréttindabrot?

Hún jaðrar við mannréttindabrot sú skoðun og lúsaleit sem fer fram á öllu milli himins og jarðar hjá þeim pörum sem vilja ættleiða barn. 

Ekkert er látið óskoðað, fjármál, einkalíf, heimilishald, bara nefndu það. Stóð ábúðarfullra barnaverndarfulltrúa kemur á heimilið, kíkt er inn í skápa, ofaní skúffur, undir mottur, allt skoðað eins og tæknimenn lögreglu væru á ferð að rannsaka glæp. Kjörinn starfsvettvangur fyrir fólk haldið sjúklegri hnýsni og þörf á að sýna vald sitt.

Væru sömu kröfur gerðar til þeirra sem geta eignast börn hjálparlaust og þær alfarið gerðar að  forsendu fyrir barneignarleyfi dæi mannkynið út á næstu öld.

Það hefur verið fallegt og gallalaust heimili þessara hjóna, fjárhagur og annað í lagi fyrst ekkert fannst til synjunar annað en líkamsþungi eiginmannsins.

Ég er ekki að segja að ekki þurfi að kanna ákveðna hluti við ættleiðingu, en fyrr má nú rota en dauðrota.

Of feitur til að ættleiða

Gleðilegt nýtt ár

Óska bloggvinum mínum, og landsmönnum öllum, gleðilegs nýs árs með þökk fyrir það liðna.

Gangið hægt um gleðinnar dyr.

.

.

Gleðilegt nýtt ár

Gleðileg jól, gott og farsælt komandi ár.

 

Óska landsmönnum öllum gleðilegrar hátíðar og gæfuríks komandi nýárs. Þakka heimsóknir á bloggið og myndasíðuna www.123.is/axeljoh á árinu sem er að líða. 

                                  Axel Jóhann Hallgrímsson 

 

Skagstrendingur ehf. óskar starfs- mönnum, viðskiptavinum svo og landsmönnum öllum gleðilegra jóla, árs og friðar.

Þakka samstarfið á árinu sem er að líða. Megi komandi ár verða, með rísandi sól, ár  hags og hamingju.

                                           Skagstrendingur ehf. 

Sloppið fyrir horn

 Jæja það var gerð heiðarleg tilraun til að brenna ofan af mér kofann í nótt. Ég var að vísu ekki heima, er á Skagaströnd og búinn að vera í nokkra daga. En Inga dóttir mín var heima en afastrákurinn minn var blessunarlega hjá pabba sínum þessa helgi.

Um kl. 4 í nótt fann  Inga reykjarlykt og fór að kanna málið. Reykur var kominn í þvottahúsið og eldhúsið en enginn eldur sýnilegur. Reykurinn kom upp um óþétta lúgu í þvottahúsgólfinu þar sem áður hafði verið stigi á milli hæða.  Þetta er gamalt tvílyft steinhús með timburgólfi á milli hæða.

Dóttir mín hringdi strax í 112 og fór svo út og reyndi að vekja upp  á neri hæðinni. Fólkið í annarri íbúðinni vaknaði strax og kom sér út en enginn svaraði í þeirri sem "eldurinn var" í, hvernig sem barið var.

Slökkvilið, lögregla og sjúkralið komu að vörmu spori, réðust til inngöngu í íbúðina og fundu ungan mann meðvitundarlausan  í íbúðinni, eldur reyndist sem betur fer ekki enn laus, en pottur var á eldavél með einhverju góðgæti sem orðið var töluvert ofeldað. Hiti var orðin mikill og aðeins mínútu spursmál að allt hefði farið í bál.

Íbúðin okkar var orðin pökkuð  af reyk og einhvern tíma tók að reykræsta, og  eftir situr illa þefjandi íbúð og einhverjar reykskemmdir.  Af einhverjum ástæðum lét reykskynjari heimilisins sér fátt um finnast og tjáði sig ekkert um málið. Hans framkoma er litin mjög alvarlegum augum.

Ég er kominn á þann aldur að þessir klassísku innanstokksmunir, svo sem húsgögn og heimilistæki,  hafa ekki mikið tilfinningalegt gildi, mestu verðmætin liggja í persónulegum munum fjölskyldurnar, sem aldrei fást bættir með fé. Ég hefði mest séð eftir bókasafninu mínu ef allt hefði farið á versta veg en fyrir lukkunnar tilverknað gerðist það ekki.

Ég vona að unga manninum hafi ekki orðið meint af þessari matseld sinni.

Harmafregn

Það er ekki nokkur vafi í mínum huga að Rúnar Júlíusson átti sér rúm í hjörtum allra landsmanna. Hans verður sárt saknað og það skarð sem hann skilur eftir sig verður seint eða aldrei fyllt.

Ég votta fjölskyldu hans og aðstandendum öllum, mína dýpstu samúð.

Rúnar Júlíusson látinn

Vinir í Manitoba.

Manitoba takk fyrir hlýjar og góðar kveðjur.

Í Kanada, verstur þar,  er stærsta byggð vestur-íslendinga og þeir hafa ætíð sýnt að þegar á bjátar slær hjarta þeirra heim.

Það er okkur íslendingum ómetanlegt að fá utanaðkomandi, hlýtt viðmót og móralskan stuðning, nú á erfiðustu tímum lýðveldisins.

.

 

Einlægustu vinir Íslands í Manitoba

Af hverju er börnunum refsað?

Ekki ætla ég að mæla því bót að foreldrar bíti börnin sín, síður en svo.

Ekki kemur fram í fréttinni að móðirin hafi að öðru leyti komið illa fram við börnin. Verður því að ætla að svo hafi ekki verið.

En af hverju er börnunum refsað? Það hlýtur að vera hverju foreldri ljóst að fimm mánaða fjarvist frá móður sinni og vist hjá vandalausum er börnunum meira áfall og refsing en móðurinni.Hér hlýtur að hafa mátt beita annarri aðferð.

Móðir dæmd fyrir að bíta son sinn

Ææ.....hún dó

Verður ekki útför á kostnað ríkisins eða minningarathöfn hið minnsta?

 Svo auðvitað fjársöfnun til styrktar nánustu ættingjum. Minna getur það vart orðið.

 

Dauð andarnefja í Höfðahverfi