Sigmundur Davíð er orðin fullsköpuð Framsóknarmaddama

Formaður Framsóknarflokksins er ekki öruggari með sig og stefnu síns flokks en svo að hann telur vænlegast, til að tryggja sjálfan sig, að hverfa frá ótryggu þingsæti sínu í Reykjavík og bjóða sig fram í N-Austurkjördæmi, hvar Framsókn á enn örugg þingsæti að öllu óbreyttu.

Sigmundur Davíð hefur þar með staðfest að hann hefur að fullu aðlagast áratugalöngum hugsunarhætti Framsóknarmanna. Sem er að tryggja fyrst og fremst, með öllum ráðum, sína eigin hagsmuni, þá flokksins og síðast þjóðarinnar, fari þeir hagsmunirnir ekki saman.

Velkominn heim í heiðardalinn Sigmundur.

Birkir Jón hættir á þingi

Gylfi er með þetta að venju - eða þannig.

Það gildir einu hver efnahagsvandinn hefur verið á Íslandi síðan 1918, eina efnahagsúrræðið sem beitt hefur verið er gengisfelling á gengisfellingu ofan.

Verði ekkert af upptöku evru eða annars erlends gjaldmiðils, er fastgengi Íslensku krónunnar  engin framtíðar lausn. Því fastgengi krónunnar má breyta með einfaldri lagasetningu.

Ef hinsvegar gildir öðru máli ef gengi krónunnar væri bundið erlendum gjaldmiðli í stjórnarskrá eða á annan þann hátt að ekki yrði hægt að laga gengið að stundarhagsmunum efnahagsins.

Slík króna myndi þá teljast ígildi þess sama erlenda gjaldmiðils og hún er bundin við og yrði þá þörf á upptöku erlends gjaldmiðils?

Vill taka upp fastgengisstefnu

Skolað út úr Framsókn

Jónína detoxdrottning Íslands ætlar í framboð fyrir Framsóknarflokkinn, vilji flokkurinn nýta þekkingu hennar og krafta.

Jónína segist ekki hafa í hyggju að fara í neinn leðjuslag í sínu framboði.

En vandséð er hvernig Jónína hyggst detoxa Framsóknarflokkinn án þess að illaþefjandi leðjan fljóti í stríðum straumum, jafnvel þótt hún noti marg vígt skolvatn.

 

Vill í framboð fyrir Framsókn

Yndislegt

Héraðsdómur Reykjavíkur hefur sýknað Teit Atlason af stefnu og skaðabóta kröfu Gunnlaugs Sigmundssonar. Dómurinn fellst ekki á uppgerðarvandlætingu Gunnlaugs og skýringar hans, hvernig hann „eignaðist“ Kögun.

Teitur og aðrir, sem hafa stigið fram fyrir skjöldu og gagnrýnt óútskýrða yfirfærslu Kögunar í rann Gunnlaugs hafa því, að mati Héraðsdóms, nokkuð til síns máls að þar hafi verið maðkur í mysunni.

Gunnlaugur var því eðlilega dæmdur til að opna veskið og greiða Teiti málskostnaðinn.

Til hamingju Teitur!

Teitur Atlason sýknaður

Hvar eru landvættir moggabloggsins?

Þegar þetta er skrifað er þessi frétt um Sædrekann orðin tveggja og hálfs tíma gömul og enn hafa engin samsæriskenningablogg komið um „augljós“ tengsl heimsóknar Sædrekans og hugsanlegrar leigu á smá spildu úr landi Grímstaða. Svo ekki sé talað um veru tveggja fulltrúa „landráðastjórnarinnar“ um borð í skipinu, hvar þeir sitja að boði ríkisstjórnarinnar að augljósum svikráðum við eigin þjóð.

Er landvætunum Moggabloggsins farið að förlast?

Í eldri frétt um ferð skipsins  hafði Páll Vilhjálmsson leigupenni og haugsmiðill, ekki Baugsmiðill, áttað sig á beinum tengslum ferðar skipsins við Samfylkinguna, eins og glöggt má sjá af siglingaleiðinni.

Hann getur verið tilfallandi glöggur hann Páll, sérílagi þegar honum er greitt fyrir það.

  

Snædrekinn við Íslandsstrendur

Slappt viðskiptavit

Þjófnaður á miklu magni af málningu að nýafstaðinni gleðigöngu er undarlegur.

Ef þjófarnir væru sannir  bissnismenn hefðu þeir hnupplað málningunni fyrir gleðigönguna þegar eftirspurn eftir málningu er í sögulegu hámarki á Íslandi, þegar hálf þjóðin, streymir spriklandi og strípuð út á stræti og torg, máluð eins villimenn.

Málningu stolið

Glæpur í matinn

Það er afskaplega skynsamlegt að haga veiðum á hrefnu eftir eftirspurn og raunar ekki forsenda fyrir öðru.

Þeir sem ekki geta unnt öðrum að neyta hrefnukjöts og kalla það jafnvel glæpsamlegt, virða ekki nein rök og una sér ekki hvíldar í áróðri sínum gegn skynsamlegri nýtingu á auðlindum sjávar. M.a. er „lítil“ neysla á hrefnukjöti notuð sem rök gegn þó afar takmörkuðum veiðum á henni, þó það sé beinlínis í hrópandi mótsögn við meintar ofveiðifullyrðingar sömu manna.

Líkur má að því leiða að eftirspurn á lambakjöti væri ekki með hressasta móti, hefði neysla á því verið stöðvuð í tuttugu ár vegna misskyldra „verndunarsjónamiða“ og heil kynslóð þannig látin fara þess á mis að alast upp við kosti þess og gæði. Þegar það kæmi á markaðinn aftur væri slök eftirspurn í upphafi að sjálfsögðu notuð sem rök gegn þeim glæp, sem neysla á kindakjöti væri sögð.

Með tíð og tíma mun neysla á hvalkjöti aukast, eftir því sem fleiri og fleiri kynnast og reyna hvaða gæða góðgæti hvalkjötið er,  hreinleika þess og hollustu. Það er nánast glæpur að vilja meina mönnum þess.

29 hrefnur eru komnar á land

Hvar í þjóðfélagsstiganum hætta skattsvik að vera afbrot?

Skattgreiðslur forsetafrúarinnar hafa verið í umræðunni í sumum fjölmiðlum undanfarið, þó aðrir reyni hvað þeir geta að þegja það hneyksli í hel.

Fremstir í þeirri þöggun fara pólitískir andstæðingar forsetans, sem þó létu sig hafa það að kjósa hann í nýafstöðnum forsetakosningum, því þeir töldu það fullnægja stjórnarandstöðu ákefð sinni og krónískum ótta við Evrópusambandið.

Ljóst er að skattauppgjör  húsmóðurinnar á Bessastöðum er ekki í samræmi við Íslensk skattalög, hvað sem skýringum forsetaembættisins líður.

Mogginn þegir þunnu hljóði  um þessi meintu skattsvik forsetafrúarinnar, sem hann best getur, en ég sé fyrir mér fyrirsagnirnar í Mogganum, greiddi einhver núverandi ráðherra eða flokksfélagi ríkisstjórnarflokkana skattana sína erlendis!

Þá yrði nú ólmast maður og afsagna krafist!

  

Faðernið sannað

Þá er það loks á hreinu að AMX.is, saurugasti vefmiðill landsins, er, sem margan hefur grunað, skilgetið afkvæmi Morgunblaðsins!  

 

Samkvæmt frétt á Vísir.is, en eðlilega ekki á mbl.is.  

Er dallurinn tómur?

Það hefði sennilega farið betur hefði Heimdallur haft sama áhuga á að vita,  fyrir hrun, hvar átrúnaðargoð þeirra voru staddir og hvað þeir voru að bralla, en það verður víst seint á óskalista Heimdalls.

  

Borgarstjórinn farinn til Noregs