Ríkisstjórnin getur ekki treyst á þessa Marshallaðstoð

Um leið og Róbert Marshall yfirgaf Samfylkinguna féll ríkisstjórnin. Að halda annað er dómgreindarskortur. Hnífsstunga Róberts í bak Samfylkingarinnar skrifaði dánarvottorð stjórnarinnar, aðeins dagsetninguna vantar.

Yfirlýsing Róberts um stuðning við ríkisstjórnina er nákvæmlega einskisvirði. Um leið og  sú staða kemur upp, þegar nær dregur kosningum, að Róbert telji að hann og hans nýi pólitíski vettvangur hagnist á andstöðu við stjórnina, mun hann taka eigin hag fram yfir gefin loforð og snúa hnífnum í sárinu. Þannig og aðeins þannig hugsa eiginhagsmunapotarar.

Jóhanna á auðvitað að hafna þessari Marshallaðstoð og bruna strax út á Bessastaði til fundar við frelsarann og biðjast lausnar fyrir sig og sitt ráðuneyti og boða til kosninga með minnsta mögulega fyrirvara.

Þannig velur hún vígvöllinn og kemur í veg fyrir að Róbert Marshall og stjórnarandstaðan ákveði að eigin hentugleika stund og stað fyrir óhjákvæmileg endalok stjórnarinnar.

 

Úrsögnin kom félögum á óvart

Af góðum heimsóknum - og miður góðum

Núna í vikunni fékk ég góða og sérlega ánægjulega heimsókn. Þar bar að garði bloggvin minn svarthamar, Hvergerðinginn Óskar Helga Helgason. Við Óskar erum fráleitt sammála um alla hluti en bloggvinátta okkar og heimsókn hans og viðræður yfir kaffibolla færðu sönnur á að alla hluti má ræða í bróðerni þótt himinn og haf skilji viðmælendur að, skoðanalega. Takk fyrir innlitið Óskar!

Það eru aðeins einfaldar og einstrengilegar sálir sem ekki þola aðrar skoðanir en þeirra sem eru nákvæmlega á þeirra eigin þröngu skoðanalínu. Rétt eins og blogg sumra hér á moggabloggi sanna. Blogg sem loka hægri vinstri á alla sem ekki eru sammála síðuhafa. Lokun á skoðanir annarra opinbera fátt annað en aumingjaskap síðuhafa.

Einn aðili er óneytanlega fremstur og forhertastur í beitingu útþurrkana og lokana, aðrir standa honum þar langt að baki, þó býsna stórtækir séu, sumir hverjir. Þessi sami maður vílar samt ekki fyrir sér að ryðjast óboðinn inn á blogg þeirra, sem hann hefur sjálfur úthýst, gera sig þar heimakominn  og belgja þar út, sig og sínar skoðanir.

Ég nefni auðvitað engin nöfn en fyrsti stafurinn er Jón Valur Jensson.

   

Skemmtilegt leiftur frá liðinni tíð

Allir, sem eru komnir á minn aldur, muna eftir „vegalöggunni“ sem var „að sunnan“ og því talin hálfgerð aðskotadýr á landsbyggðinni og af mörgum litin hornauga.

Það fennir ótrúlega fljótt yfir liðna tíð. Ég var nánast búinn að gleyma þvílík hörmung vegakerfi landsins var á þessum tíma.

Gott framtak hjá lögreglunni, takk fyrir.

  

Skyggnst inn í horfinn tíma

Eftir hverju dansa glæpa limirnir, ef ekki höfðinu?

Tarfurinn, Víðir Þorgeirsson, foringi glæpasamtakana Outlaws er laus úr haldi eftir að dómari hafnaði kröfu lögreglunnar um gæsluvarðhald.

Það hlýtur að vekja upp spurningar, eftir stórtækar aðgerðir lögreglu gegn glæpasamtökunum, hvar eiturlyf, gambri, landi, eimingartæki, vopn og hvaðeina var haldlagt, að foringja glæpamannanna skuli sleppt að skipun dómara og hann þannig, ekki talinn tengjast málinu!

Ekki er forysta Tarfsins og stjórn og tök hans á glæpasamtökunum Outlows upp á marga fiska dansi glæpalimirnir eftir einhverju öðru en hans fyrirmælum.

Var dómaranum hótað? Það væri hrein afneitun að afskrifa það. Það er staðreynd að lögreglumönnum hefur verið hótað því að þeir og fjölskyldur þeirra væru ekki óhultar færu þeir fram í ákveðnum málum. Það væri barnalegt að ætla að glæpamenn, sem einskis svífast, beiti sér ekki með sama hætti gegn öðrum starfsmönnum réttarkerfisins.

Íslenskir glæpamenn eru því miður ekki lengur neinar dúkkulísur, þeir eru orðnir alvöru, ef svo hallærislega má að orði komast.

Viðauki:

Frá því var greint í hádegisfréttum RUV að lögreglan hafi haft fyrir því áræðanlegar heimildir að glæpasamtökin Outlows hafi verið að undirbúa innrásir á heimili lögreglumanna til að beita þá og fjölskyldur þeirra ofbeldi í þeirra óþjóðfélagslega og glæpsamlega tilgangi.

Málið er litið grafalvarlegum augum, eðlilega, en ekki allstaðar greinilega.

Þetta styður, frekar en hitt, að dómaranum sem sleppti Tarfinum úr haldi hafi hreinlega ekki verið sjálfrátt! 

Kröfu um gæsluvarðhald hafnað

Til hamingju með daginn Jóhanna

Til hamingju með daginn Jóhanna Sigurðardóttir, hafðu þökk fyrir störf þín í þágu lands og þjóðar.

Lifðu drekktu og dansaðu á ævikvöldinu.

Vonandi auðnast mér að árna þér heilla á aldarafmælinu.

  

Óska formanninum til hamingju

Undarleg hugmynd

Sú hugmynd er ekki ný af nálinni að Arnold Schwarzenegger sé framtíðar forseti Bandaríkjanna og henni skýtur upp annað veifið, þótt öllum ætti að vera ljóst að hugmyndin er andvana fædd.  

Arnold karlinn getur aldrei orðið forseti BNA. Ástæðan er einföld, hann uppfyllir ekki það ófrávíkjanlega skilyrði að vera fæddur í Bandaríkjunum. Arnold, er eins og flestir vita fæddur og uppalinn í Austurríki.

Þetta ættu Repúblikanar, aðdáendur Svartahneggs að vita, svo ákaft sem þeir hafa haldið því fram að fæðingarvottorð Obama forseta sé falsað, að hann sé fæddur erlendis en ekki á Hawaii og því ekki réttkjörinn forseti. 

 

Verður Schwarzenegger forseti?

Íslendingar eiga ástandið skilið

Europris ætlar að hætta verslunarrekstri  á Íslandi. Verslunin auglýsir því veglega rýmingarsölu. Og hvað gerist?  Í stað þess að þjóðin sýni þeirri ákvörðun fingurinn, hundsi þessa „útsölu“ og segi Europris þannig að ætli þeir að hverfa úr verslunarrekstri og samkeppni hér á landi þá geti þeir bara átt sinn lager, þá ryðst landinn sem aldrei fyrr fram og inn um dyr Europris, í von um smá hagnað, til að auðvelda þeim að hverfa frá samkeppni á Íslandi og stuðla þannig til framtíðar að hærra vöruverðverði.

Þannig vill til að þeir sem gráðugt streyma inn um dyr Europris, í von um skjótfenginn stundargróða eru þeir sömu og ekki náðu upp í nef sér af hneykslan yfir  græðgisvæðingu þjóðfélagsins sem olli bankahruninu, en það er auðvitað löngu gleymt.

Svo koma þeir sömu og núna streyma með „gróðann sinn“ út úr Europris, fram  síðar og óskapast yfir fákeppni í verslunarrekstrinum á Íslandi og verðlaginu. 

Þangað til Íslendingar hætta að hugsa aðeins um eigið rassgat og stundarhagsmuni, þá eiga þeir það efnahagsástand sem hér ríkir svo sannarlega skilið.

Erill á rýmingarsölu Europris

Það skyldi þá ekki vera...

...að einmitt þannig sé málið gegn Gunnari Andersen vaxið og tilorðið!

 

Helgi sótti um ásamt Gunnari

Er Framsókn að klofna í frumeindir fyrir hugleysi formannsins?

Hugleysi formanns Framsóknarflokksins að hlaupast undan ábyrgð og flýja frá kjördæmi sínu í Reykjavík og ætla með frekju að troða sér í öruggt sæti í Norðausturkjördæmi og ryðja þeim frá sem hafa með vinnu og elju skapað sér þar sess, veldur vaxandi titringi í flokknum.

Þessi blauða tilraun formannsins að tryggja framtíð eigin þjóhnappa á þingi, á kostnað samherja, er til þess eins fallin að kljúfa Framsóknarflokkinn og hefur í raun þegar gert það.

Spurningin er aðeins hve alvarlegur klofningurinn verður, hvort flokksbrotin muni sjáist með einföldu stækkunargleri eða hvort til þess þurfi smásjá eða öflugri tæki.

Telur framboðið vera dómgreindarbrest